समृद्धि बास्केटबलमा एन्जल्स हार्टलाई सफलता

काठमाडौं । एन्जल्स हार्टले समृद्धि यु–१९ राष्ट्रिय बास्केटबल प्रतियोगिताको पुरुषमा सफलता हात पारेको छ ।

बुधबार भएको खेलमा एन्जल्स हार्टले ट्रिनिटीलाई ७९–६४ ले पराजित गर्यो । एन्जल्स हार्टका सागर परियारले २३ स्कोर गरे ।

समृद्धि स्कुलको सहकार्यमा नेपाल बास्केटबल संघद्वारा आयोजित प्रतियोगिताको पुरुषमै टाइमआउट, कीर्तिपुर र आईएसए नेपालले जित हात पारे ।

टाइमआउटले बौद्धलाई ७६–६९ ले हरायो । टाइमआउटका साम्देन दोर्जेले १९ अंक जोडे । कीर्तिपुरले योद्धालाई ९४–५९ ले पाखा लगायो ।

कीर्तिपुरको जितमा आशिष मगरले २८ अंक योगदान गरे । विवेक गौतमको ३३ अंक सहयोगमा आइएसए नेपालले स्नोल्यान्डमाथि ७४–६९ को जित दर्ता गर्यो ।

त्रिपुरेश्वरस्थित राष्ट्रिय खेलकुद परिषद्को कभर्डहलमा जारी प्रतियोगिताको महिलामा बूढानीलकण्ठ र भ्याली पब्लिक विजयी भए ।

भ्याली पब्लिकले जेभियर इन्टरनेसनल कलेजलाई ४७–४२ ले पन्छायो । भ्याली पब्लिकका लागि एन्जल गुप्ताले १२ स्कोर गरिन् ।

बूढानीलकण्ठले गोल्डेन गेट इन्टरनेसनल कलेजलाई ४४–२७ ले निराश पार्यो । बूढानीलकण्ठकी विनामणीले १८ अंक जोडिन् ।