‘एक्स्ट्राटेक ओवल’को पारसद्धारा निरिक्षण

काठमाडौं । नेपाल क्रिकेट संघ क्यानका सचिव पारस खड्काले ब्यक्तिगत लगानीमा निर्माणाधीन अन्तराष्ट्रिय क्रिकेट रंगशाला ‘एक्स्ट्राटेक ओवल’ मैदानको निरिक्षण गरेका छन् । 

क्यान सचिव खड्काले रुपन्देहीको तिलोत्तमामा नीजि लगानीमा निर्माणाधिन २५ हजार दर्शक क्षमताको अन्तराष्ट्रिय स्तरको क्रिकेट रंगशालाको मंगलबार निरिक्षण गरेका हुन् ।

गुुल्मी स्थायी घर भएर अष्ट्रेलियालाई कर्मथलो बनाएका बिनोद कुँवरले ब्यक्तिगत लगानीमा तिलोत्तमामा क्रिकेट रंगशाला निर्माण गर्दैछन् । क्रिकेट एकेडेमी समेत सञ्चालन गर्ने उद्धेश्य सहित रंगशाला निर्माणमा जुटेका कुँवरले अहिले नेपालमै बसेर पिच निर्माणको कामलाई अन्तिम चरणमा पुर्याउका छन् । 

क्यानको प्रमुख जिम्मेवारीमा आएपछि पारसले पहिलो पटक तिलोत्तमा पुगेर रंगशाला निर्माणको कामको अवलोकन गरेका हुन् । उनले क्रिकेटको भौतिक पूर्वाधारको विकासमा सहयोग पुग्ने कामको प्रशंसा गर्दै शुभकामना दिएका थिए । सचिव पारसले क्यानबाट हुने सबै खाले आवश्यक सहयोग गर्ने प्रतिबद्धता समेत निरिक्षणको क्रममा ब्यक्त गरेका थिए ।

मैदानको अवलोकन गराउँदै कुँवरले चाँडैनै खेल्न योग्य मैदान बनाउने तयारी सुनाएका थिए । ‘हामी छिट्टै खेल्न योग्य मैदान बनाउँछौं । त्यसपछि अन्य पूर्वाधारको काम अघि बढाउँछौं ।’ कुँवरले मैदानको अवलोकन गराउँदै भने । 

कुँवरले पूर्व राष्ट्रिय खेलाडी शक्ति गौचनलाई साथमा लिएर मैदान निर्माणको कामलाई तिव्र गतिमा अघि बढाएका छन् । अन्तराष्ट्रिय क्रिकेट रंगशालासँगै एकेडेमी खोलेर क्रिकेटर उत्पादन गर्ने कार्यलाई एक्स्ट्राटेक ओवलले आफ्नो मुख्य उद्धेश्यमा राखेको छ । 

करिब चार वर्षभित्र निर्माण सम्पन्न गर्ने लक्ष्य राखिएको रंगशालाको निर्माण कार्य यसै वर्षदेखि सुरु भएको हो । पहिलो वर्ष ५ हजार दर्शक क्षमता र त्यसपछि प्रत्येक वर्ष ५ हजारका दरले दर्शक क्षमता सिटको निर्माण गर्ने लक्ष्य राखिएको छ । 

क्रिकेट रंगशालामा होस्टेल सहितको एकेडेमी सञ्चालन गर्ने लक्ष्य राखिएको एक्स्ट्राटेक ओभल प्रालीका प्रबन्ध निर्देशक बिनोद कुँवरले बताएका छन् ।