के हार्दिक पाण्ड्या बन्लान् मुम्बईको कप्तान ?
काठमाडौं । इन्डियन प्रिमियर लिग क्रिकेट आइपीएल टिम गुजरात टाइटन्सका कप्तान हार्दिक पाण्ड्याले आफ्नो टोलीसँग सम्बन्ध तोडेका छन् । अब उनी आफ्नो पुरानो मुम्बई इन्डियन्स टोलीमा फर्किएका छन्।
मुम्बईले उनलाई किर्तिमानी मुल्य ट्रेडमा भित्र्याएको छ । हार्दिकले आईपीएलको पछिल्लो दुई सिजनमा आफ्नो कप्तानी क्षमता प्रमाणित गरिसकेका छन् । साथै, उनलाई भारतको ह्वाइट बल टिमको अर्को नियमित कप्तानको रुपमा पनि हेरिएको छ ।
मुम्बई इन्डियन्सले हार्दिकलाई टिमको कप्तान बनाउन सक्ने विश्वास गरिएको छ । तर, रोहित शर्माबाट कप्तानी खोस्ने निर्णय सहज भने हुने छैन ।
रोहितले मुम्बईलाई पाँच पटक च्याम्पियन बनाएका छन् । हालै सम्पन्न एकदिवसीय विश्वकपमा पनि उनको कप्तानीको निकै प्रशंसा भएको छ ।
रोहित शर्माको कप्तानीमा रहेको मुम्बईको टोलीसँग पाण्ड्यालाई फर्काउन पर्याप्त पैसा पनि बाँकी थिएन। त्यसैले उसले अस्ट्रेलियाली अलराउन्डर क्यामरुन ग्रिन आरसिबीलाई बेचेको छ।
