योगेन श्रेष्ठ
पोखरा । राष्ट्रिय क्रिकेट टोलीका प्रभावशाली खेलाडी कुशल भुर्तेलको शतकिय इनिङ्समा नेपाल पुलिस क्लबले प्रथम केपी ओली कप राष्ट्रिय टी ट्वान्टी क्रिकेट प्रतियोगितामा शानदार जित निकालेको छ ।
मदन भण्डारी स्पोर्टस एकेडेमीको आयोजनामा पोखरामा जारी प्रतियोगितामा समुह सी अन्तर्गत आइतबार भएको खेलमा विभागीय टोली पुलिसले मधेश प्रदेशलाई ५७ रनले हराएको हो ।
कुशलले ५६ बलमा ७ छक्का र ८ चौकाको मद्धतले १ सय २ रन बनाए । उनी जारी प्रतियोगितामा शतक प्रहार गर्ने पहिलो खेलाडी बनेका छन् ।
कुशलले २६ बलमा ५० रन पुरा गरेका थिए । उनी विशाल शुसलिङको बलमा आउट भए ।
टस जितेर पहिले ब्याटिङ गरेको पुलिसले ५ विकेटको क्षतीमा १ सय ७५ रन बनाए। सुनिल धमलाले ४७ बलमा ४५ रनको योगदान दिए । खेलमा ५ बल खेलेका करन केसीले २ छक्का र १ चौका प्रहार गर्दै १६ रन जोडे । अन्य खेलाडीले दोहोरो अंकको स्कोर छुन सकेनन् । आरिफ शेख ६ र राशिद खानले ३ रन बनाए ।
मधेश प्रदेशका विशाल शुसलिङ र विशाल पटेलले समान २ तथा रुपेश सिंहले १ विकेट हात पारे ।
जवाफी व्याटिङमा उत्रिएको मधेश प्रदेश भने १८ दशमलव २ ओभरमा १ सय १८ रनमा समेटियो । मधेशका ब्याटरले पुलिसको बलिङ सामु खुलेर खेल्न सकेनन् । रुपेश सिंहले २५ बलमा ३ चौका र ३ छक्का प्रहार गदै सर्वाधिक ४० रन बनाए । इमरान शेखले २२, रोहन विक र राकेश कमातले समान १० रन जोडे ।
पुलिसका करन केसी, सागर ढकाल, राशिद खान र ललित राजवंशीले समान २ विकेट लिए । कुशल भुर्तेल र सुनिल धमलाको नाममा समान १ विकेट रह्यो ।
प्रतियोगिता अन्तर्गत सोमबार सुदूरपश्चिम प्रदेशविरुद्ध नेपाल पुलिस र दोश्रो खेल कोशी प्रदेश र त्रिभवन आर्मी क्लबबीच प्रतिस्पर्धा हुनेछ ।
एपीएफ अन्तिम चारमा
अर्को खेलमा गण्डकी प्रदेश लुम्बिनीसंग पराजित हुँदा शसस्त्र प्रहरीको एपीएफ क्लब सेमिफाइनलमा स्थान पक्का गरेको छ । महत्वपूर्ण खेलमा गण्डकी पराजित हुँदै प्रतियोगिताबाट बाहिरिएको छ । एपीएफ रनरेटका आधारमा सेमीफाइनलमा स्थान पक्का गरेको हो ।
पोखरा रंगशालास्थित क्रिकेट मैदानमा जारी प्रतियोगितामा ७ प्रदेश, विभागीय तीन टिम र आयोजकका दुई टिमको सहभागीता छ ।
प्रतियोगितामा उपाधि विजेताले ५ लाख, उपविजेताले २ लाख ५० हजार नगदसहित सिल्ड, मेडल र प्रमाणपत्र प्राप्त गर्ने छन् ।
म्यान अफ द सिरिजले नगद ३० हजार, बेस्ट बलरले नगद २० हजार र म्यान अफ द म्याचले नगद ५ हजार रूपैयाँ नगद प्राप्त गर्ने आयोजकले जनाएको छ ।
