महिला साफ हुने शहीद रंगशाला विराटनगर महानगरले निर्माण गर्ने

काठमाडौं । महिला साफ च्याम्पियनसिप हुने शहीद रंगशालाको निर्माण विराटनगर महानगरपालिकाले गर्ने भएको छ । मोफसलमा पहिलो पटक हुन लागेको साफ फुटबलको प्रतियोगिताको खेल स्थल शहीद रंगशालालाई महानगरपालिकाले निर्माण गर्ने सहमती बनेको हो ।

शनिबार एक कार्यक्रमकाबीच महानगरका मेयर भीम पराजुली र अखिल नेपाल फुटबल संघ एन्फाका अध्यक्ष कर्माछिरिङ शेर्र्पा सम्झौतापत्रमा हस्ताक्षर गरेका छन् ।
सम्झौता अनुसार प्रतियोगिता हुने मैदान शहीद रंगशालाको निर्माण महानगरपालिकाले गर्नेछ ।

विराटनगरपालिका भित्र पर्ने शहीद रंगशालालाई स्तरीय र खेल्न लायक बनाउन महानगरपालिका सहमत भएको हो । सहमतीसंगै रंगशालामा जोडिएको ड्रेसिङ रुम लगायत पार्किङ स्थल समेत महानगरपालिकाले बनाउनेछ ।

सोही रंगशालामा मोफसलको ठुलो प्रतियोगिता विराट गोल्डकप हुँदै आएको थियो । एन्फाले नेपालले आयोजना गर्ने मौका पाएको महिला साफ च्याम्पियनसिप पहिलो पटक काठमाडौं बाहिर लैजाने निर्णय गरेको थियो ।

महानगरपालिकाले आफ्नो क्षेत्रमा आयोजना हुन लागेको प्रतियोगितालाई सक्दो सहयोग गर्ने प्रतिबद्वता समेत जनाएको छ । महानगरले खेलस्थलबाट होटलसम्म पुग्ने बाटोलाई पक्की पिच गर्ने र सम्पुर्ण भौतिक पुर्वाधार निर्माणमा सहयोग गर्ने समेत प्रतिबद्वता जनाएको छ ।