नेपालविरुद्ध युवा टिम उतार्दै भारत

काठमाडौं । नेपाली क्रिकेटको चर्चा रोकिने छाँट देखिएको छैन । पछिल्लो समय राष्ट्रिय क्रिकेट टिमले अन्तराष्ट्रिय स्तरमा एकपछि अर्को सफलता र चर्चा बटुलिरहेको छ । 

एसियाडमा पदकका लागि नेपाली खेलाडीले संघर्ष गरिरहदाँ राष्ट्रिय क्रिकेट टिमले भने सम्पुर्णको ध्यान खिचेको छ । नकआउट चरण पुग्न नेपालले समूह चरणमा खेल्न परेको थियो । 

समूह चरणमा भर्खरै अन्तराष्ट्रिय क्रिकेटमा प्रवेश गरेको मंगोलियामाथि कीर्तिमानको बर्षा गर्यो । एसियन गेम्समा नेपालका केही यस्ता कीर्तिमान बने, जो सायदै मेटिनेछन्, हुन सक्छ कुनै समय ती भेटिनेसम्म छन् ।

खासै अन्तराष्ट्रिय अनुभव बटुल्न नपाउने नेपालले अन्तराष्ट्रिय प्रतियोगितामा सिनियर टिमनै खेलाउने गरेको छ । एसियन गेम्समा समेत नेपालको पहिलो रोजाईको टिमनै गएको छ । समयले एकपछि नेपालको भेट पुन भारतसँग गराउँदैछ । 

केही समय अघि नेपालले एसिया कपमा भारतसँग खेलेको थियो । नतिजा त गुमायो तर शानदार प्रर्दशन गर्यो । त्यो प्रर्दशनको आजपनि अन्तराष्ट्रिय मिडियामा चर्चा भैरहेको छ ।

एसियन गेम्समा नेपालको सिनियर टिम सहभागी भएपनि भारतले भने युवा खेलाडीलाई अवसर दिएको छ । ती युवा खेलाडी, जसले भारतीय अन्तराष्ट्रिय प्रतियोगिता आईपीएलमा तहल्का मच्चाएका थिए । 

भारतको टिममा रोहित शर्मा, विराट कोहली हुने छैनन् तर आईपीएलका तहल्का मच्चाएका युवा खेलाडीलाई भारतीय टिमले एसियन गेम्समा मौका दिएको छ । भारतीय टिम अक्टोबर ५ बाट आईसीसीस ओडीआई विश्वकपनै खेल्दैछ । पहिलो रोजाईको टिम अहिले विश्वकपकै तयारीमा छ ।

भारतीय टिमले हाङजाओमा भैरहेको एसियन गेम्समा आईपीएलमा उत्कृष्ट प्रर्दशन गरेका युवा खेलाडीलाई समावेश गरेको छ । भारतले एसियन गेम्सको पुरुष क्रिकेटमा स्वर्णलाई पहिलो लक्ष्य राखेको छ । जुन लक्ष्य महिला क्रिकेट टिमले पुरा गरिसकेको छ ।

भारतीय टिमको कप्तानी २६ वर्षका ऋतुराज गायकवाडले गर्नेछन् । आईपीएलमा चेन्नेई सुपर किंग्सबाट खेलेका गायकवाडले भारतीय युवा टिमको चीनमा नेतृत्व गर्नेछन् । 

सन् २०२३ को आईपीएलमा पञ्जाब किंग्सबाट सर्वाधिक विकेट लिने खेलाडी मध्यका एक अर्शदीप सिंह समेत भारतीय टिममा रहेका छन् । यस्तै राजस्थान रोयल्सका यशस्वी जयसवाललाई टिममा राखिएको छ, जसले वेस्ट इन्डिजविरुद्धको डेब्यु टेष्ट क्रिकेटमा शतक प्रहार गरेका थिए । 

अर्का चल्ता खेलाडी छन्, रिङ्कु सिंह । कोलकत्ता नाइस राइडर्सका यि खेलाडी सन् २०२३ को आईपीएलमा सधै हेडलाईन बनेका थिए । जसले भारतीय टिममै समेत स्थान बनाएका थिए ।

भारतीय टिम :

ऋतुराज गायकवाड, यशस्वी जयसवाल, राहुल त्रिपाठी, तिलक वर्मा, रिंकु सिंह, जितेश शर्मा, वाशिंगटन सुन्दर, शाहबाज अहमद, रवि बिश्रोई, अवेश खान, अर्शदीप सिंह, मुकेश कुमार, शिवम दुबे, प्रभसिमरन सिंह, आकाश गहरा