'जनकपुरधाममा अन्तर्राष्ट्रिय स्तरको रंगशाला निर्माण प्रक्रिया छिट्टै शुरु हुन्छ'

निजगढ । मधेश प्रदेशका भौतिक पुर्वाधार बिकास मन्त्री कृष्ण यादवले रामजानकी अन्तर्राष्ट्रिय रंगशाला निर्माण प्रक्रिया छिट्टै शुरु हुने बताएका छन् । 

कलैयामा मधेश प्रदेश क्रिकेट संघको दोश्रो अधिवेशनलाई सम्बोधन गर्दै मन्त्री यादवले प्रदेश सरकारको आन्तरिक कारणले रंगशाला निर्माण प्रक्रियामा ढिलाइ हुन गएको जनाउँदै केही समयमै रंगशाला निर्माणले गति लिने विश्वास व्यक्त गरे । 

'प्रदेश सरकार रंगशाला निर्माणमा दत्तचित्त भएर लागिपरिरहेको छ । हामी भित्र केही व्यवस्थापनको कमजोरिको कारण यो कुरा अघि बढिसकेको छैन ।' मन्त्री यादवले भने ।

'मुख्यमन्त्री ज्युको अस्वस्थताको कारण काम रोकिएको छ । उहाँ आउने बित्तिकै यो कुरा अघि बढ्छ ।'  रंगशाला निर्माणको लागी कन्सल्यान्टसंग पनि कन्सर्न गरिसकेको मन्त्री यादवले बताए । 

'जग्गा पनि प्राप्ती गरिसकेका छौ । हामिसङ्ग पैसा पनि छ खाली यसलाई कार्यान्वयन गर्न मात्र बाकी छ ।' मन्त्री यादवले भने । 

भारतिय प्रधानमन्त्री नरेन्द्र मोदि २०७५ सालमा जनकपुरधाम आउनुहुँदा गोपाल धर्मशाला निर्माणकोलागी १ अर्ब रुपैयाँ सहयोग गर्ने भनिएको रकम रंगशाला निर्माणका लागी डाइभर्ट गर्न लागिएको हो । 

प्रदेश सरकारले समेत थप रकम विनियोजन गरेर मधेश प्रदेशमा अन्तर्राष्ट्रिय स्तरको रंगशाला निर्माण गर्ने योजना बनाएको यादवले बताए । यसको लागी मुख्यमन्त्री सरोज कुमार यादव र आफुले भारतिय दूतावाससंग छलफल गरिसकेको र दूतावासले समेत रंगशाला निर्माणमा चासो देखाएको मन्त्री यादवले जनाए ।

रंगशाला निर्माणसंगै मधेशमा राष्ट्रिय तथा अन्तर्राष्ट्रिय स्तरका खेलकुद प्रतियोगिताहरु आयोजना हुने र मधेश प्रदेशमा खेलाडी उत्पादनमा पनि सहयोग पुग्ने सरोकारवालाहरुको प्रतिक्रिया रहेको छ ।