कभर्डहल र क्रिकेट मैदानको सम्भाव्यता अध्ययन गरिने 

पोखरा । प्रदेश खेलकुद परिषद गण्डकीले गण्डकी प्रदेशमा कभर्डहल निर्माण र क्रिकेट खेल मैदान निर्माणको सम्भाव्यता अध्ययन गर्ने भएको छ ।

परिषदको सोमबार बसेको कार्यकारी समितिको बैठकले सो निर्णय गरेको हो । 

परिषदका सदस्य सचिव श्रीधर शर्माको अध्यक्षतमा सम्पन्न बैठकले कभर्डहल निर्माण र क्रिकेट खेल मैदानको सम्भव्यता अध्ययन गर्न परिषदका कार्यकारी सदस्य ऋषीराम गौतमको संयोजकत्वमा ५ सदस्यीय उपसमिति गठन गरेको छ ।

सो उपसमितिको सदस्यमा कार्यकारी सदस्य तारामायाँ थापा मगर, परिषदका सदस्य केशव पाठक, विष्णुमायाँ गुरुङ र कार्यालय प्रमुख तोपलाल भुसाल रहेका छन् । बैठकले भदौ ३० गते सम्म सोको अध्ययन गरी प्रतिवेदन पेश गर्न समय तोकिएको छ ।

बैठकले विभिन्न प्रतियोगिता सञ्चालन, खेलाडी कल्याणकारी कोषको व्यवस्थापन तथा खेलाडी सम्मान पदक नमुनाको कार्यविधि र मापदण्ड तयार गरी मन्त्रालयमा पेश गर्न सदस्य सचिव शर्माको संयोजकत्वमा ५ सदस्यिय उपसमिति गठन गरेको छ । 
उपसमितिको सदस्यमा कार्यकारी सदस्य दिल बहादुर गुरुङ, परिषदका सदस्य खगेन्द्र क्षेत्री, मन्त्रालयका कानुन अधिकृत सिर्जना आचार्य र परिषदका कार्यालय प्रमुख तोपलाल भुसाल रहेका छन् ।

यसै गरी बैठकले २०८० मा प्रदेश भित्र हुने खेल गतिविधि तथा प्रतियोगिताहरुको सञ्चालन र कार्यतालिका क्यालेण्डर निर्माण गर्न कार्यकारी सदस्य दिल बहादुर गुरुङको संयोजकत्वमा ५ सदस्यीय उपासमिति गठन गरेको छ । 

सोको सदस्यमा परिषदका सदस्य योगेन्द्र शेरचन, खगेन्द्र क्षेत्री, शुभकन्या गुरुङ, कार्यालय प्रमुख भुसाल र लेखा प्रमुख निलकण्ठ ढकाल रहेका छन् ।

हालै राष्ट्रिय खेलकुद परिषदबाट प्रदेश खेलकुद परिषद अन्तर्गत आएका कर्मचारीहरुको व्यवस्थापन गर्न तथा परिषदलाई आवश्यक कर्मचारीहरुको लागि संगठन संरचना ओएनएम निर्माण गरी अघि बढ्ने प्रदेश खेलकुद विकास परिषद्ले जनाएको छ । सो ओएनएम निर्माण गर्न सदस्य सचिव शर्माको संयोजकत्वमा तीन सदस्यीय उपसमिति गठन गरिएको छ । समितिमा मन्त्रालयका कानुन अधिकृत आचार्य र परिषदका कार्यालय प्रुमख भुसाल रहेका छन् ।