‘सन्यासको बारेमा सोचेको छैन’ 

काठमाडौं । सुनिल क्षेत्री वर्तमान समयका दक्षिण एसियाली फुटबलका सबैभन्दा ठुला स्टार हुन् । भारतीय राष्ट्रिय टिमका कप्तान क्षेत्री उमेरले ३८ वर्षका छन् । तर उनको आक्रमक फुटबलले भारतीय टिमलाई अन्तराष्ट्रिय फुटबलमा एकपछि अर्को सफलता दिलाईरहेको छ । भारतमा साफ च्याम्पियनसिप चलिरहेको छ । सुनिलको प्रर्दशनले सबै प्रश्नको उत्तर दिन्छ । उनले तीन खेलमा पाँच गोल गरिसकेका छन् ।

उनले भारतबाट अन्तराष्ट्रिय फुटबलमा ९२ गोल गरेका छन् । उनकै प्रर्दशनमा भारतले सेमिफाइनलसम्मको यात्रा तय गरेको छ । उनैको नेतृत्वमा भारतले भर्खरै इन्टरकन्टिनेन्टल कप प्रतियोगिताको उपाधिनै जित्यो ।

सुनिलको बढ्दो उमेरलाई लिएर धेरैको प्रश्न छ, उनको कहिले सन्यास लिन्छन् । ब्यवसायीक फुटबल करियरको हिसाबले ३८ वर्ष उत्तरार्धको समय हो । धेरै खेलाडीले यस उमेरमा सन्यास लिने गर्छन् । तर सुनिलको प्रर्दशन उमेरका हिसाबले अझ जब्बर बन्दै गएको छ । उनले निरन्तर भारतका लागि गोल गरिरहेका छन् ।

भारतमा चलिरहेको साफमा सुनिलको सन्यासलाई लिएर समेत चर्चा छ । तर उनी यसबारे अहिलेसम्म नसोचेको बताउँछन् । उनले आफुले लिने सन्यासको समयसिमा अहिलेसम्म निर्धारण नगरेको धारणा राख्छन् । 

‘मलाई थाहा छैन, भारतका लागि मेरो अन्तिम खेल कहिले हुन्छ भनेर । मैले कहिल्यै दिर्घकालिन लक्ष्य बनाएको छैन । म अघिल्लो खेल र त्यसपछिको १० दिनको बारेमा मात्र सोच्छु । सन्यास एक दिन हुन्छनै तर यसबारे मैले अहिलेसम्म सोचेको छैन । दुखको कुरा मैले यसबारे बताउँन सक्दिन । यो एक वर्षमा हुन्छ वा ६ महिनामा हुन्छ भनेर ।’ सुनिलले साफ च्याम्पियनसिपको दौरान भनेका छन् ।
‘मेरो परिवारले समेत यसको अनुमान गरिरहेको छ, यसलाई सौभाग्य भनौं वा दुर्भाग्य । जब उनीहरु यसबारे भन्छन्, मजाकमा मैले आफ्नो रेकर्ड बताउने गरेको छु ।’ उनले भनेका छन् ।