न्यु डायमण्ड कप भलिबल पुसको अन्तिम साता

काठमाडौं । दोस्रो संस्करणको न्यु डायमण्ड कप खुला राष्ट्रिय महिला भलिबल प्रतियोगिता पुसको अन्तिम साता हुने भएको छ । आयोजक न्यु डायमण्ड स्पोर्टस क्लबले बिहिबार काठमाडौंमा पत्रकार सम्मेलनको आयोजना गरेर प्रतियोगिता पुस २५ बाट २८ गतेसम्म सञ्चालन गरिने जानकारी दिएको हो ।

प्रतियोगिता नयाँ बसपार्कस्थित ढोरपाटन क्लबको खेल मैदानमा हुनेछ । प्रतियोगितामा ६ देखि ८ टिमले मात्र भाग लिनेछन् ।

प्रतियोगिताको बिजेताले उपाधि सहित ३ लाख र उपविजेताले २ लाख रुपैयाँ प्राप्त गर्नेछन् । तेस्रो हुने टिमले एक लाख एक हजार रुपैयाँ प्राप्त गर्नेछ । प्रतियोगिताको सर्वोकृष्ट खेलाडीले १५ हजार रुपैयाँ प्राप्त गर्नेछ । ब्यक्तिगत विधाका उत्कृष्टले जनही ५÷५ हजार रुपैयाँ प्राप्त गर्नेछन् ।

प्रतियोगितामा सहभागि हुने काठमाडौं बाहिरको टिमलाई खान, बस्न र यातायात खर्चको व्यवस्था गरिएको आयोजकले जनाएको छ । प्रतियोगिताको कुल बजेट करिब २३ लाख रुपैयाँ रहेको छ ।