'ए' डिभिजन लिगको जर्सी नं ९९

इलाम । विश्व खेलकुदमा ९९ अंकलाई विशेष महत्व रहन्छ । अझ ९९ को महत्व क्रिकेटर सचिन तेन्दुलकर र मिस्बाह उल हकÞले सबैभन्दा बढि महसुस गरेका हुन् । यी २ क्रिकेटर पटक–पटक ९९ रनमा आउट हुँदै शतक बनाउनबाट चुके । फुटबल जगतकै कुरा गर्दा केही स्टार खेलाडीहरुले ९९ नम्बर जर्सीबाट सुरुवात गरेका छन् । यो सुचीमा शिर्ष स्थानमा आउँछन् ब्राजिलियन रोनाल्डो नाजारियो र इटालियन सुटस्टपर जियानुलुजी डोनारुमा । पोल्यान्डका आर्किडुयस मिलिकले समेत जर्सी नं ९९ लगाए । रोनाल्डोले एसी मिलानसँग इटाली फर्कँदा ९९ लगाएका थिए । फिलिपो इन्जाघीले जर्सी नं ९ लगाएका कारण रोनाल्डोले ९९ लगाए । गोलरक्षक भिटोर बायाले पोर्चुगिज च्याम्पियन पोर्टोका लागि ९९ नम्बर जर्सीमा सन् २००४ मा च्याम्पियन्स लिग जिते । रोनाल्डोको व्यवसायिक फुटबल सन्यासपछि एसी मिलानमा गोलरक्षक डोनारुमा ९९ नम्बर जर्सीमा देखिए । अहिले फ्रान्सेली क्लब पिएसजीमा समेत डोनारुमा जर्सी नं ९९ मा देखिन्छन् ।

तर, नेपाली फुटबलमा भने जर्सी नं ९९ को प्रसंग अलि फरक छ । जारी शहिद स्मारक लिगमा हिमालयन शेर्पा क्लबले पहिलो पटक ९९ जर्सी कार्यान्वयनमा ल्याएको छ । शेर्पाका निशान लिम्बु जर्सी नं ९९ लगाएर मैदानमा उत्रदै आएका छन् । उनले लगाएको जर्सी पंकज नेम्वाङ नेतृत्व प्रति व्यङ्ग्य हो ।  श्रोतबाट प्राप्त जानकारी अनुसार निशानलाई दिइएको जर्सी एन्फा बरिष्ठ उपाध्यक्ष विर बहादुर खड्कालाई दिइएको सुविधा प्रतिको व्यङ्ग्य हो । गत फागुनमा बसेको एन्फाको बैठकले बरिष्ठ उपाध्यक्ष खड्कालाई ९९ हजार मासिक तलब दिने निर्णय गरेको थियो । सोही तलबलाई लिएर शेर्पाले जर्सीको माध्यमबाट सांकेतिक रुपमा विरोध गरेको हो । अखिल नेपाल फुटबल संघ (एन्फा) का पदाधिकारी सबै पदहरू भोलेन्टियर हो । उनीहरू सबैले एन्फामा नेपाली फुटबलको विकासका लागि भनेर भोलेन्टियर पद सम्हालेका हुन् । तर पदाधिकारीको तलब तोकिएपछि निवर्तमान अध्यक्षको क्लबले व्यङ्ग्यात्मक विरोध गरेको हो ।   एन्फाको निर्णय नम्बर १३ को ‘च’ मा वरिष्ठ उपाध्यक्षले सहिद स्मारक ए, बी र सी डिभिजन लगायतको प्रतियोगितामा पूर्ण समय दिनुपर्ने भएकाले तलब दिने निर्णय गरेको थियो ।   

निशानको तर्क भने अलि फरक छ । उनी रोनाल्डोले झै जर्सी नं ९ नपाउने भएपछि आफ्नो मनपर्ने नम्बर ९ को बदलामा ९९ लगाएको बताए । ‘ मलाई मन पर्ने जर्सी ९ नम्बर हो तर त्यो नम्बर नपाउने भएपछि ९९ लगाए ।’ शेर्पामा जर्सी नं ९ केन्याली सेन्ट्रल फरवार्ड पिस्टोन मुटाम्बाले लगाउँदै आएका छन् । 

एन्फाले बनाएको शहिद स्मारक ए डिभिजन लिग फुटबल प्रतियोगिता नियमावली २०७९ अनुसार सहभागी १४ वटा क्लबले ५० नम्बर भन्दा माथिको जर्सी प्रयोग गर्न पाउने छैनन् । नियमावलीको नियम १६ अन्तर्गत जर्सी कलर र किट्समा उल्लेख भए अनुसार जर्सी नम्बर १ देखि ५० भित्र हुनुपर्नेछ । भने गोलरक्षकको निम्ति १ नम्बर जर्सी छुट्याएको हुनुपर्दछ ।

तर एन्फा निर्वतमान अध्यक्ष कर्माछिरिङ शेर्पाको क्लब हिमालयन शेर्पाले नियमावली मिच्दै वर्तमान नेतृत्वको आलोचना स्वरुप जर्सी नं ९९ प्रयोगमा ल्याएको हो । अखिल नेपाल फुटबल संघ एन्फाका प्रवक्ता सुरेश शाहले  नियमावली कार्यान्वयन गराउन नसक्नु कमजोरी रहेको बताए । उनी जर्सी इन्ट्रीलाई अप्रुभ गर्ने कर्मचारीबाट गल्ती भएको भन्दै पन्छिए । ‘ लिगको खेल भन्दा अघि नै फिफा कनेन्ट अनलाइनबाट खेलाडीको जर्सी नम्बर दर्ता, जर्सी कलर लगायतका कुराहरु इन्ट्री गर्नुपर्ने हून्छ त्यो काम सम्बन्धित क्लबले गर्ने हो । तर इन्ट्रीलाई अप्रुभ गर्ने साथीले त्यसो नगरेको भए हुन्थ्यो । स्विकार्नु चाहि गल्ती हो ।’ उनले भने ‘ प्राविधिक टिमसंग बसेर यस बारेका समिक्षा गर्दै सुधार हुनेछ ।’

एन्फाका महासचिव किरण राईले नियमावली मिचेर अघि बढ्नेलाई कारवाही गरिने बताए । उनले नियमावली मिच्नेलाई नियमावलीमा तोकिएको बमोजिमको कारवाही गर्न एन्फा तयार रहेको समेत बताए । 

लिगमा ९९ नम्बर जर्सी प्रयोगमा ल्याउने हिमालय शेर्पा एक्लो क्लब भने हैन् । विभागीय टोली नेपाल पुलिस र संकटा क्लबले समेत ९९ जर्सी लगाएका छन् । संकटा कर्माछिरिङ शेर्पा नेतृत्वमा रहँदा महासचिव रहेको इन्द्रमान तुलाधरको क्लब समेत हो । संकटाका टिम कोअर्डिनेटर रवि बज्रचार्य अन्य क्लबले समेत जर्सी नं ९९ प्रयोगमा ल्याएपछि आफुहरुले समेत लगाएको बताए । ‘ सवैभन्दा पहिलो हिमालयन शेर्पाले जर्सी नं ९९ लगाएको थियो । अहिले संकटा र पुलिसमा समेत कार्यान्वय भएको छ । अरुले लगाउने पाउने भएपछि हाम्रो खेलाडीले समेत सोही जर्सी मनपराएर लगाएका हौ ।’ उनले एन्फा विरुद्ध आलोचनालाई अस्विकार गरे । ‘ कसैको समर्थन वा विरोधमा संकटाले जर्सी नं ९९ कार्यान्वयनमा ल्याएको हैन् । खेलाडीको रोजाई अनुसार प्रयोग गरिएको हो ।’ उनले भने

नेपाल पुलिसमा लेवनानी फरवार्ड अहमद हिजाजीले जसीं नं ९९ लगाउँदै आएका छन् । संकटाको तर्फबाट लेवनानी सेन्ट्रल फरवार्ड युसुफ अट्रेसले लगाएका हुन् ।