महर्जन चर्च ब्वाइजको मुख्य प्रशिक्षक

काठमाडौं । सहिद स्मारक 'ए' डिभिजन क्लब चर्च ब्वाइज युनाईटेडले बाल गोपाल महर्जनलाई मुख्य प्रशिक्षक नियुक्त गरेको छ ।

चर्च ब्वाइजले बुधबार महर्जनलाई मुख्य प्रशिक्षक नियुक्त गरिएको जनाएको छ ।

'ए' लिगको नवप्रवेशी क्लब चर्च ब्वाइजले यस सिजनको लिगका लागि महर्जनलाई मुख्य प्रशिक्षक नियुक्त गरेको हो ।

नेपाली राष्ट्रिय टिमका पूर्व प्रशिक्षक महर्जनको यो तेस्रो 'ए' लिग क्लब हो ।

यस अघि उनले मनाङ मर्स्याङ्दी क्लब र थ्री स्टारको टोली सम्हालिसकेका छन् ।

मुख्य प्रशिक्षक प्रदिप हुमागाईले क्लब छाडेपछि मुख्य प्रशिक्षक विहीन रहेको थियो ।

नेपाली मुलका अमेरिकी नागरिक हुमागाईलाई चर्च ब्वाइजले एक सिजनका लागि मुख्य प्रशिक्षक नियुक्त गरेको थियो ।

तर, श्रम स्वीकृति नपाएपछि उनले क्लब छाडेका थिए ।

यस सिजन चर्च ब्वाइज १३ अंक जोडेर तेस्रो स्थान रहेको छ ।