न्युजिल्यान्डलाई श्रीलंकाविरुद्धको सिरिज
काठमाडौं । घरेलु टोली न्युजिल्यान्डले श्रीलंकाविरुद्धको टी-ट्वान्टी सिरिज जितेको छ ।
शनिबार भएको तेस्रो टी-ट्वान्टी खेल ४ विकेटले जितेसँगै घरेलु टोलीले तीन खेलको टी-ट्वान्टी अन्तराष्ट्रिय सिरिज २-१ ले जितेको हो ।
न्युजिल्यान्डको क्विनस्टाउनमा भएको खेलमा घरेलु टोली ४ विकेटले जित हासिल गरिएको हो ।
श्रीलंकाले दिएको १ सय ८३ रनको लक्ष्य घरेलु टोलीले १९ ओभर ५ बलमा ६ विकेट गुमाएर पूरा गर्यो ।
घरेलु टोलीका लागि ओपनर टिम सिर्फटले ४८ बलमा १० चौका तथा ३ छक्काको सहयोगमा ८८ रनको अर्धशतकीय ईनिङ खेले ।
कप्तान टम लाथमले २३ बलमा १ चौका र १ छक्काको सहयोगमा ३१ रन बनाए ।
ओपनर चाड बोइसले १७ रन बनाउँदा मार्क च्यापम्यानले १६ रन बनाए ।
पाहुना टोलीका लागि लाहिरु कुमाराले ३ तथा प्रमोद मधरशंका र महेस थिक्सनाले समान १/१ विकेट लिए ।
त्यसअघि टस हारेर पहिले ब्याटिङ गरेको भ्रमणकारी टोलीले २० ओभरमा ६ विकेट गुमाएर १ सय ८२ रन बनाएको थियो ।
पाहुना टोलीका लागि ओपनर कुशल मेन्डिसले ४८ बलमा ६ चौका र ५ छक्काको सहयोगमा ७३ रनको अर्धशतकीय ईनिङ खेले ।
कुशल परेरा २१ बलमा ३३ रनमा रन आउट हुँदा ओपनर पथुम निशंका २५ बलमा २५ रन बनाउँदै आउट भए ।
घरेलु टोलीका लागि बेन लिस्टरले २ तथा एडम मिल्ने र ईस सोधीले समान १/१ विकेट लिए ।
पहिलो खेल श्रीलंकाले सुपर ओभरमा जितेको थियो । दोस्रो खेल घरेलु टोलीले जितेको थियो ।
