मुम्बईलाई हराउदै बेंग्लोरको सुखद सुरुआत
काठमाडौं । कप्तान फाफ डु प्लेसिस र विराट कोहलीको उत्कृष्ट ब्याटिङको सहयोगमा रोयल च्यालेन्जर्स बेंग्लोरले इन्डियन प्रिमियर लिग (आइपिएल) २०२३ मा विजयी सुरुआत गरेको छ ।
बेंग्लोर घरेलु मैदान एम चिन्नास्वामी अन्तराष्ट्रिय क्रिकेट मैदानमा घरेलु टोलीले मुम्बई इन्डियन्सलाई ८ विकेटले हराउँदै सानदार विजयी सुरुआत गरेको हो ।
आईतबार राती भएको खेलमा मुम्बईले दिएको १ सय ७२ रनको लक्ष्य बेंग्लोरले १६ ओभर २ बलमा २ विकेट गुमाउँदै पूरा गर्यो ।
बेंग्लोरका लागि कप्तान फफ डु प्लेसिस तथा पूर्व कप्तान विराट कोहलीले अर्धशतक बनाए ।
कोहली ४९ बलमा ६ चौका र ५ छक्कासहित ८२ रनमा अविजित रहँदा फाफ ४३ बलमा ५ चौका र ६ छक्कासहित ७३ रनमा आउट भए ।
पहिलो विकेटका लागि कोहली र डु प्लेसिसले १ सय ४८ रनको शतकीय साझेदारी गरेका थिए ।
ग्लेन म्याक्सवेल ३ बलमा २ छक्कासहित १२ रनमा अविजित रहे ।
मुम्बईका क्यामरन ग्रीन र अर्शद खानले समान १/१ विकेट लिए ।
त्यसअघि टस हारेर पहिला ब्याटिङ गरेको मुम्बईले २० ओभरमा ७ विकेट गुमाउँदै १ सय ७१ रन बनाएको थियो ।
मुम्बईका लागि तिलक बर्मा ४६ बलमा ९ चौका र ४ छक्कासहित ८४ रनमा अविजित रहे । निहाल वाधिराले १३ बलमा २१ तथा अर्सद खानले ९ बलमा अविजित १५ रन बनाए ।
सुर्यकुमार यादवले १५ रन बनाउँदा ईसान किसनले १० रन बनाए ।
बेंग्लोरका लागि कर्ण शर्माले २ तथा मोहम्मद शिराज, रिस टोप्ली, आकाश दीप, हर्षल पटेल र माइकल ब्रेसवेलले समान १/१ विकेट लिए ।
जितसँगै बेंग्लोरले २ अंक जोडेको छ । बेंग्लोर अंक तालिकाको तेस्रो स्थानमा रहेको छ ।
हारसँगै अंकबिहिन मुम्बई भने आठौं स्थानमा रहेको छ ।
