अमेरिकाविरुद्ध पीएनजी पहिला बलिङ गर्दै
काठमाडौं । नामिबियामा जारी रहेको आईसीसी विश्वकप छनोट प्लेअफ प्रतियोगितामा पपुवा न्यु गिनी(पीएनजी)ले पहिला बलिङ गर्दैछ ।
नामिबियाको वन्डुरस क्रिकेट मैदानमा टस जितेर अमेरिकाले पहिला ब्याटिङ रोजेपछि पीएनजीले बलिङ गर्दैछ ।
दुवै टोलीले प्रतियोगितामा आ-आफ्नो चौथो खेल खेल्न लागेका हुन् । तीन खेलमा २ जितका साथ ६ टोली सहभागी प्रतियोगितामा अमेरिका दोस्रो स्थानमा रहेको छ ।
अंक बिहिन पीएनजी विश्वकप छनोटमा स्थान बनाउँन तथा एकदिवसीय अन्तराष्ट्रिय मान्यता कायम गर्ने दौडबाट बाहिरिसकेको छ ।
पीएनजी यस प्रतियोगितामा पहिलो जितको खोजीमा रहेको छ ।
प्रतियोगितामा ६ टोलीको सहभागीता रहेको छ । प्लेअफमा आईसीसी विश्वकप लिग टू का पुछारका चार टोलीसँगै आईसीसी विश्वकप च्यालेन्ज लिग ए र बी का विजेता राष्ट्रहरुको सहभागीता रहेको छ ।
लिग टू मा नामिबिया चौथो, अमेरिका पाँचौं, युएई छैटौं र पपुवा न्युगिनी पुछारमा रहँदै प्लेअफमा रहेका छन् । प्लेअफमा च्यालेन्ज लिग ए र बी का विजेता जर्सी र क्यानडा पनि रहेका छन् ।
सिंगल राउन्ड रोविनको आधारमा हुने प्रतियोगितामा शीर्ष दुई टोलीले जिम्बावेमा हुने विश्वकप छनोट खेल्न पाउनेछन् । विश्वकप छनोट खेलका लागि नेपाल भने छनोट भईसकेको छ ।
त्यस्तै पुछारका दुई टोली युएई र पीएनजीले भने प्लेअफमार्फत एकदिवसीय अन्तराष्ट्रिय मान्यता जोगाउनु पर्नेछ ।
प्लेअफ प्रतियोगिताका सबै खेल एकदिवसीय अन्तराष्ट्रिय मान्यता प्राप्त हुनेछन् ।
प्लेअफमा अमेरिका र नामिबियाले जुनसुकै स्थान हासिल गरेपनि एकदिवसीय अन्तराष्ट्रिय मान्यता जोगाइसकेका छन्।
युएई र पीएनजीले एकदिवसीय अन्तराष्ट्रिय मान्यता जोगाउन भने क्यानडा र जर्सीभन्दा माथि रहेर प्लेअफको अन्त्य गर्नुपर्ने हुन्छ ।
