काठमाडौं । लिग फुटबलमा एक समय धेरैको आरोप थियो, आर्मी फिजिकल गेम मात्र खेल्छ । घरेलु फुटबलमा पाईला राखेपछि आर्मी लामो समय सो आरोपबाट मुक्त हुन सकेन । विभागीय टिम पुलिसले घरेलु फुटबलमा एकपछि अर्को सफलता हात पारिरहदाँ अर्को विभागीय टिम त्यसको मुख दर्शक रह्यो ।
विभागमा स्रोत साधनले सम्पन्न आर्मीले विस्तारै फुटबलमा ध्यान बढायो । राम्रा खेलाडीलाई क्लबमा अनुबन्धन ग¥यो । 'पावर गेम'को उस्ताज मानिने आर्मीले विस्तारै आफुलाई प्राविधिक रुपमा समेत बलियो बनाउदै लग्यो । त्यसकै नजिता स्वरुप पछिल्लो समय उसले घरेलु फुटबलमा एक पछि अर्को उपाधि दाबेदारिता प्रस्तुत गरिरहेको छ ।
घरेलु फुटबलमा लिग जित्न नसकेको तथ्यले उसलाई पिरोलिरहन्छ । शारिरिक र प्राविधिक रुपमा बलियो बनेको आर्मी फुटबलमा नयाँ विरासत खडा गर्न चाहन्छ । तर यात्रा सहज भने छैन । फुटबलमा उपाधि जितेर आफुलाई प्रमाणित गर्नुपर्ने चुनौती उसको अगाडी छ ।
शुक्रबार (आज) आर्मीले सहिद स्मारक ए डिभिजन लिगको महत्वपुर्ण खेलमा सिग्नेचर मनाङ मस्र्याङ्दी क्लबसंग खेल्दैछ । प्रर्दशनलाई आधार मान्ने हो भने, यही खेलको नतिजाले सम्पुर्ण लिगको उपाधि सम्भावनाको बिषयमा बोल्नेछ ।
सिधा कुरा, मनाङविरुद्व आर्मीको जितले उपाधि होड खुला हुनेछ । त्यसमा आर्मीसंगै थ्री स्टार र संकटाले समेत चुनौती पेश गर्ने अवसर प्राप्त गर्नेछन् ।
तर यदी मनाङले जितेको खण्डमा उसले लिगमा स्पष्ट ६ अंकको अग्रता लिनेछ । अर्थात, अन्य क्लबको उपाधि सम्भावना पातलो बन्ने छ । उपाधि यात्रामा मनाङ अझ मजबुुद भएर लम्किनेछ, अघि बढ्नेछ ।
मुख्य स्ट्राईकर नवयुग श्रेष्ठ लयमा फर्कन संघर्षरत छन् । अर्का आक्रमक खेलाडी जर्ज प्रिन्स कार्की अहिले टिममा छैनन् । कप्तान तथा फरवार्ड भरत खवासमा आर्मीको अग्रपङ्ती निर्भर छ ।
यता, मनाङका मुख्य खेलाडी घाईते छन् । तर यसको असर मनाङको प्रर्दशनमा देखिएको छ । मैदानमा मनाङमा स्ट्राईकर ओलावाले अफिजले आफुलाई जबर्जस्त स्थापित गरिरहेका छन् । उनकै नायकत्वमा मनाङले यसपटकको लिग उपाधि जित्ने अपेक्षा गरेको छ ।
‘नेपालको घरेलु फुटबलमा मनाङका स्ट्राईकर अफिज निकै राम्रो देखिएका छन् । उनलाई रोक्न कुनैपनि क्लबले सकिरहेका छैनन् । सोही कारण उपाधि यात्रामा मनाङ सर्वाधिक दाबेदार टोली हो ।’ खेल बिश्लेषक सञ्जिव मिश्र भन्छन् ।
जारी लिगमा राष्ट्रिय टिमका खेलाडीको प्रर्दशन निकै नाजुक छ । तर स्ट्राईकर अन्जन विष्टले मनाङको जर्सीमा आफुलाई प्रमाणीत गरेका छन् । निकै राम्रो फर्म देखिएका उनको खातामा ५ गोल छ ।
