केपी ओली कप : फाइनलको टिकट मूल्य ३ सय, अन्य खेल निशुल्क

काठमाडौं । केपी ओली कप राष्ट्रिय फुटबल च्याम्पियनसिप अन्तर्गत नकआउट चरणको खेल हेर्न दर्शकलाई शुल्क नलाग्ने भएको छ ।

आयोजक राष्ट्रिय युवा संघ नेपालले नकआउट चरणको खेल हेर्न शुल्क नलाग्ने जनाएको छ ।

तर, आयोजकले फाइनलमा भने शुल्क राखिएको जनाएको छ । फाइनलमा ३ सय टिकट मूल्य राखिएको छ ।

प्रतियोगिता भोलि फागुन ११ गतेबाट सुरु भएर १७ गतेसम्म संचालन हुनेछ ।

प्रतियोगिता आठ टोलीको सहभागिता रहेको छ ।

प्रतियोगितामा 'ए' डिभिजन क्लबका ७ र एक आयोजक टोली गरि ८ टिमले प्रतिस्पर्धा गर्ने छन् । 

प्रतियोगिताको पहिलो खेलमा नेपाल पुलिस क्लब र सातदोबाटो युथ क्लब भिड्ने छन् ।

पुलिस र सातदोबाटोबीचको उद्घाटन खेल बिहीबार एन्फा कम्प्लेक्समा हुनेछ । खेल ३ बजे सुरु हुनेछ ।

प्रतियोगिताको फाइनल बाहेक सम्पूर्ण खेल एन्फा कम्प्लेक्स सातदोबाटोमा हुनेछ । फाइनल खेल भने दशरथ रंगशालामा आयोजना हुनेछ ।

'ए' डिभिजनका  मछिन्द्र फुटबल क्लब, त्रिभुवन आर्मी क्लब, नेपाल पुलिस क्लब, न्युरोड टिम एनआरटी, चर्च ब्वाइज युनाईटेड क्लब, सातदोबाटो युथ क्लब र जवालाखेल युथ क्लब छन् । एक आयोजक टोली केपी ओली फुटबल क्लब रहेको छ ।

प्रतियोगिताको विजेताले उपाधिसहित १० लाख नगद तथा उपविजेताले ५ लाख नगद प्राप्त गर्ने आयोजकले जनाएको छ ।

प्रतियोगिताका सर्बोत्कृष्ट खेलाडीले १ लाख नगद पाउने छन् । त्यसैगरी उत्कृष्ट गोलरक्षक, उत्कृष्ट गोलकर्ता र उदयमान खेलाडीले ५० हजार पाउने छन् ।

प्रत्येक खेलको विजेता टोलीलाई २५ हजार नगद पुरस्कार दिइनेछ भने प्रत्येक खेलका म्यान अफ दि म्याचले १५ हजार पाउने छन्।