नामिबियाविरुद्ध नेपाल : सम्भावित प्लेईङ-११

काठमाडौं । आईसीसी विश्वकप लिग टू अन्तर्गतको नेपाल सिरिजमा घरेलु टोलीले आज मंगलबार आफ्नो पहिलो खेलमा नामिबियासँग खेल्दैछ ।

टियु क्रिकेट मैदानमा नेपाल र नामिबियाबीचको खेल बिहान ९ बजे सुरु हुनेछ ।

दुवै टोली सिरिजको पहिलो खेलमा खेल्दै छन् । नामिबिया तथा नेपाल सिरिज जितका साथ सुरुआत गर्न चाहान्छन् । 

नामिबियालाई घरेलु मैदानमा पहिलो पटक एकदिवसीय अन्तराष्ट्रियमा हराउने लक्ष्यमा नेपाल रहेको छ । त्यसैले नेपालले बलियो टोली मैदान उतार्नेछ ।

नेपालले ओपनरका रुपमा आसिफ शेख र कुशल भुर्तेलको जोडी रहने सम्भावना रहेको छ । पछिल्लो समय कुशलको ब्याटबाट रन बन्न नसकिरहेकाले कुशलबाट जिम्मेवारी पूर्ण ब्याटिङको अपेक्षा रहन्छ ।

तीन नम्बरमा पूर्व कप्तान ज्ञानेन्द्र मल्ल रहने सम्भावना छ । ज्ञानेन्द्रले अन्तराष्ट्रिय क्रिकेटमा पछिल्लो केही खेल यता देखाएको लयलाई जिम्मेवारीका साथ अघि बढाउन जरुरी रहेको छ ।

चौथो र पाँचौ स्थानमा दीपेन्द्र सिंह ऐरी र कप्तान रोहित पौडेलले स्थान बनाउने छन् । दीपेन्द्रको ब्याटबाट विश्वकप लिग टूका खेलहरुमा रन नबनी रहेको स्थितिमा घरेलु मैदानमा उनले ठूलो पारी खेल्नु पर्ने देखिन्छ । कप्तान पौडेलले आफ्नो लयलाई निरन्तरता दिन आवश्यक देखिन्छ ।

अलराउण्डर कुशल मल्ल छैटौं स्थानमा रहँदा सातौं नम्बरमा गुल्सन झा को सम्भावना रहेको छ । कुशल लामो विस्फोटक ब्याटरका साथ केही ओभर बलिङमा समेत टोलीको साथ दिने खेलाडी हुन् । झा तीव्र गतिका बलरका साथ तल्लो क्रममा लामो सटका साथ ब्याटिङ समेतको क्षमता राख्छन् ।

आठौं र नवौं स्थानमा तिव्र गतिका बलरद्वय करण केसी र सोमपाल कामी रहने छन् । केसी र सोमपाल तीव्र गतिका बलरका साथ तल्लो क्रममा लामो सटका साथ ब्याटिङ समेतको क्षमता राख्छन् ।

दशौं र एघारौं नम्बरमा सन्दीप लामिछाने र ललित नारायण राजवंशी रहने छन् । लामो समय पछि टोलीमा फर्किएका पूर्व कप्तान लामिछाने नेपाली बलिङका प्रमुख हतियार हुन् ।

नेपालको सम्भावित प्लेईङ-११

आसिफ शेख (विकेट किपर),कुशल भुर्तेल,ज्ञानेन्द्र मल्ल, दीपेन्द्र सिंह ऐरी,रोहित पौडेल (कप्तान),गुल्सन झा,कुशल मल्ल,करण केसी,सोमपाल कामी, सन्दीप लामिछाने र ललित नारायण राजवंशी