सिरिज अति महत्वपूर्ण - कप्तान पौडेल 

काठमाडौं । मंगलबारबाट सुरु नेपाल,नामिबिया र स्कटल्याण्ड सम्मिलित त्रिकोणात्मक सिरिज नेपालका लागि एकदमै महत्वपूर्ण रहेको नेपाली राष्ट्रिय क्रिकेट टिमका कप्तान रोहित पौडेलले बताएका छन् । 

मंगलबार त्रिवि मैदान किर्तिपुरमा सुरु हुने सिरिजको अगाडी आयोजित पत्रकार सम्मेलनमा आगामी दुई सिरिज कस्तो रहने भन्ने यो सिरिजले देखाउने पौडेलले बताए ।

'यो सिरिज हाम्रो लागि एकदमै महत्वपूर्ण रहेको छ । नेक्स्ट टु सिरिज समेत यसै सिरिजमा भर पर्छ । लास्ट बाह्र खेलमा नौ खेल जित्नुपर्नेछ । टिमको माहोल मोन्टी सरको आगमन पछि एकदम राम्रो रहेको र टिममा युनिटी समेत राम्रो रहेको छ ,' पौडेलले भने 'कन्फिडेन्स लेभल सबै खेलाडीको हाई रहेको छ । सबै जना राम्रो पोजिशनमा पनि हुनुहुन्छ । सबै जना मेन्टलि रुपमा समेत फिट हुनुहुन्छ ।. 

घरेलु मैदानको नेपाली टिमलाई पूरा थाहा भएकोले आफुहरुलाई थप सुविधा समेत मिलेको कप्तान रोहितले बताए ।

'घरेलु मैदानको एडभान्टेज हामीलाई हुन्छ नै हामीलाई मैदानको बारेमा सबै थाहा छ । मैदानको डाईमेन्सन देखि सबै कुरा थाहा छ । आफुमा एप्लाई गर्ने हो कसरी खेल्ने भनेर ,' उनले भने 'मोन्टी सरलाई हामीहरुले अण्डर नाईन्टिनको समय देखि चिनेका छौं । सरको बानी कस्तो रहेको छ भनेर सबै जानकार नै छौं त्यसकारण सरसँग काम गर्दा कठिन भएन ।'

सिरिज फेब्रुअरी १४ देखि २१ सम्म हुनेछ ।  सिरिजको पहिलो खेलमा नेपालले नामिबियासँग खेल्नेछ । जुन खेल फेब्रुअरी १४ मा हुनेछ । यस्तै नेपालले दोस्रो खेलमा स्कटल्याण्डसँग फेब्रुअरी १७ मा खेल्नेछ ।

नेपालले फेब्रुअरी १८ मा नामिबियासँग दोस्रो खेल खेल्दा स्कटल्याण्डसँग फेब्रुअरी २१ मा पुन: खेल्नेछ ।