लिटल फ्लावरको लगातार तेश्रो जित

धनगढी । धनगढीमा जारी विद्यालय स्तरीय यु–१९ राष्ट्रिय टी–२० क्रिकेट प्रतियोगिता लिटल फ्लावर प्रिमियर लिग (एलपीएल) अन्तर्गत बिहीबार कन्चनपुरको भुवनेश्वरी विद्या मन्दिर र धनगढीको लिटल फ्लावर स्कुल विजयी भएका छन् ।

पहिलो खेलमा भुवनेश्वरी विद्या मन्दिरले सैनिक आवासीय महाविद्यालयलाई १० विकेटले पराजित गर्यो। प्रतियोगितामा भुवनेश्वरीको यो दोश्रो जित हो। सैनिकले दिएको ३४ रनको सामान्य लक्ष्य भुवनेश्वरीले ३.५ ओभरमा विकेट नगुमाई पूरा गर्यो ।

लोकेश जोशीले अविजित २० तथा बिशेष नाथले अविजित ६ रन बनाउदै सहज जित दिलाए। यस अघि टस जितेर ब्याटिङ गरेको सैनिकले १२.४ ओभरमा ३३ रनमा सबै विकेट गुमायो। बिशाल ऐरले १८ रन बनाउनु बाहेक उसका अन्य कुनै पनि ब्याट्सम्यानले दोहोरो अंकमा रन बनाउन सकेनन् ।

भुवनेश्वरीका बलर खगेन्द्र ठगुन्ना एक्लैले ५ विकेट लिए जुन क्रममा ३.४ ओभरमा २ मेडन ओभर गर्दै ६ रन खर्चिए। उनि प्लेयर अफ द म्याच घोषित भए।

यस्तै भारत चन्दले ४ विकेट लिए जुन क्रममा ३ ओभरमा १ मेडन ओभर गर्दै ७ रन खर्चि ए। कैलाश ऐरले १ विकेट लिए।

दोश्रो खेलमा लिटल फ्लावर स्कुल धनगढीले वेस्टर्न क्रिस्टल एकेडेमी धनगढीलाई ९ विकेटले पराजित गर्यो। प्रतियोगितामा लिटल फ्लावरको यो लगातार तेश्रो जित हो। वेस्टर्न क्रिस्टलले दिएको १२८ रनको लक्ष्य लिटल फ्लावरले १२.४ ओभरमा १ विकेट क्षतिमा पूरा गर्यो ।

लिटल फ्लावरका ओपनर सुबोध ऐर र बिपिन रावलले ९ ओभरमा ९४ रनको साझेदारी गर्दै जितको आधार तयार गरे। सुबोधले मात्र २८ बलमा ८ चौका र २ छक्का मद्दतले ५१ रन बनाए। बिपिनले अविजित ५७ रन बनाए जुन क्रममा ३५ बलमा ९ चौका र १ छक्का प्रहार गरे। नरेन भट्टले अविजित १५ रन बनाए।

यस अघि टस जितेर ब्याटिंग गरेको वेस्टर्न क्रिस्टलले २० ओभरमा ७ विकेट क्षेतीमा १२७ रन बनायो। उसको लागि ओपनर डबल ऐरले सर्वाधिक ४६ रन तथा निरज ऐरले अविजित २० रन बनाए।

लिटल फ्लावरका बलर सचिन भट्टले ३ विकेट लिए जुन क्रममा ४ ओभरमा २० रन खर्चिए। सुबोध ऐरले २ तथा रोशन रावल र आशिष सानुले १/१ विकेट लिए। खेलको प्लेयर अफ द म्याच बिपिन रावल घोषित भए ।

प्रतियोगिता अन्तर्गत शुक्रबार दुई खेल हुनेछन् ।

लिटल फ्लावर स्पोर्ट्स एण्ड इभेन्ट्सको आयोजनामा फागुन ६ गतेसम्म सञ्चालन हुने प्रतियोगिताको विजेतालाई २ लाख ५१ हजार १ सय ११ र उपविजेतालाई १ लाख २५ हजार ५ सय २५ नगदसहित ट्रफी, मेडल र प्रमाण पत्र प्रदान गरिने छ ।

प्रतियोगिताको सर्वोत्कृष्ट खेलाडीले नगद २० हजार, उत्कृष्ट बलर र ब्याट्सम्यानले १०÷१० हजार नगदसहित ट्रफी, मेडल र प्रमाण पत्र प्राप्त गर्नेछन् । त्यस्तै उदीयमान खेलाडीलाई नगद ५ हजार प्रदान गरिने आयोजकले जनाएको छ ।