त्रिदेशीय सिरिजको टिकट मुल्य सार्वजनिक

काठमाडौं । यसै वर्ष भारतमा आयोजना हुने एकदिवसीय विश्वकपको छनोटको रुपमा रहेको विश्वकप लिग-टू अन्तर्गत आगामी साताबाट नेपालमा सुरु हुने त्रिदेशीय एकदिवसीय सिरिजको टिकट दर सार्वजनिक भएको छ । 

सिरिजका लागि दुई प्रकारका टिकटको व्यवस्था गरिएको छ । साधारण तर्फ बसेर हेर्ने दर्शकका लागि रु १ सय ५० को टिकटको व्यवस्था गरिएको छ । सिट सुविधा सहितको टिकट दर भने रु.३ सय ५० तोकिएको नेपाल क्रिकेट संघ(क्यान)ले जनाएको छ । 

'माई पे'बाट टिकट लिने सकिने क्यानले बताएको छ ।

टियु क्रिकेट मैदानमा आयोजना हुने सिरिजमा नेपाल, नामिबिया र स्कटल्याण्डले प्रतिस्पर्धा गर्ने छन् ।

सिरिजको पहिलो खेलमा नेपालले नामिबियासँग खेल्नेछ ।  जुन खेल फेब्रुअरी १४ मा हुनेछ ।यस्तै नेपालले दोस्रो खेलमा स्कटल्याण्डसँग फेब्रुअरी १७ मा खेल्नेछ ।

नेपालले फेब्रुअरी १८ मा नामिबियासँग दोस्रो खेल खेल्दा स्कटल्याण्डसँग फेब्रुअरी २१ मा पुन: खेल्नेछ ।सिरिजमा नेपाल २४ खेलमा १८ अंक जोडेर छैटौं स्थानमा रहेको छ ।

स्कटल्याण्ड ३२ खेलमा ४६ अंक जोडेर शीर्ष स्थानमा रहेको छ । नामिबिया ३० खेलमा ३७ अंक जोडेर तेस्रो स्थानमा रहेको छ ।