काठमाडौं । आठ दिन राष्ट्रिय टोलीलाई प्रशिक्षण दिएपछि सोमबार मात्र औपचारिक रुपमा मोन्टी देशाई नेपाली क्रिकेट टोलीको मुख्य प्रशिक्षकमा नियुक्त भएका छन् ।
यसअघि पनि पटक पटक नेपाली टोलीसँग जोडिएका मोन्टी मुख्य प्रशिक्षकका रुपमा पहिलो पटक नेपाली टोलीसँग जोडिएका छन् । २ वर्षे कार्यकालका लागि सम्झौता भएका उनको कार्यकाल चुनौती नै चुनौतीले भरिएको छ ।
नेपाली टोलीका मुख्य प्रशिक्षकले मुख्यत पाँच चुनौतीलाई पार गर्नु पर्नेहुन्छ ।
१) एकदिवसीय मान्यतालाई जोगाउनु
२०१८ देखि २०२३ सम्म नेपालले पाएको एकदिवसीय अन्तराष्ट्रिय मान्यतालाई आगामी पाँच वर्षसम्म निरन्तरता दिनु नयाँ प्रशिक्षकलाई चुनौती हुनेछ ।
यसका लागि जारी रहेको विश्वकप लिग टूको शीर्ष पाँचमा रहन आवश्यक छ । शीर्ष पाँचमा रहन नेपालले लिग टूका बाँकी रहेका १२ खेलमा कम्तिमा पनि ९ खेल जित्न आवश्यक रहेको छ ।
एकदिवसीय मान्यतासँगै नेपालले विश्वकप छनोट प्लेअफ हुदै विश्वकप छनोटमा स्थान बनाएर एकदिवसीय विश्वकपको बाटो खुल्ला राख्नु उनको चुनौती रहेको छ । यस्तै २०२४ को टी-ट्वान्टी विश्वकपमा नेपालको स्थान पक्का गर्न पनि नयाँ प्रशिक्षकका लागि चुनौती रहेनेछ ।
२) कमजोर ब्याटिङको सुधार
अहिले मात्र नभई लामो समयबाट कमजोर रहेको नेपालको ब्याटिङ सुधार्न धेरै प्रयासहरु भए । तर, ती सबै असफल रह्यो । नेपालले कमजोर ब्याटिङकै कारण धेरै खेलमा हार व्यहोरेको छ । अब आउने प्रशिक्षकले नेपालको ब्याटिङलाई सुधार गर्न आवश्यकता छ ।
नेपाली टिम भावनात्मक रुपले नजिक भएकाले नेपाली टिम रोजेको मोन्टी बताउँछन् । यस अघि धेरै पटक ब्याटिङ सल्लाहकारका रुपमा नेपाली टिममा आफ्नो समय बिताएका थिए । नेपालको ब्याटिङ समस्या बुझेको बताउने मोन्टिले आफुले वेस्ट इण्डिजको राष्ट्रिय टोली लगायत ठूला क्रिकेट राष्ट्रमा देखाएको ब्याटिङ सुधारको क्षमता नेपाली टिमका लागि पनि देखाउन आवश्यक रहेको छ ।
३) एसिया कपमा छनोट
नेपालले एसिया कपको छनोट मानिएको एसिएन प्रिमियर कपको आयोजना गर्दैछ । १० टोली सहभागी रहने यस प्रतियोगिताको शीर्ष स्थानमा रहँदै एसिया कपका लागि छनोट गराउनु उनको अर्को चुनौती रहेको छ ।
४) गुटबन्दी अन्त्य
खेलाडीहरु कोहीको नजिक, कोहीको टाढा हुनु सामान्य रहन्छ । तर, नेपाली क्रिकेट टोलीको कमजोर नतिजा आईरहनुको मुख्य कारण धेरैले खेलाडीको गुटबन्दीलाई प्रमुख मान्दै आएका छन् । यस अघिका मुख्य प्रशिक्षकहरुले पनि टिम छोडेर जादै गर्दा यो स्विकारेको विषय हो । गुटबन्दीको सिकार बनेको नेपाली टिमलाई एकताबद्ध गरी बलियो नतिजातर्फ उन्मुख गराउनु नयाँ प्रशिक्षकको चुनौती हुनेछ ।
५) राम्रो नतिजा
अन्य खेलको जस्तै क्रिकेटबाट पनि राम्रो भन्दा राम्रो नतिजाको अपेक्षा सबैले राख्दछन् । तर, पछिल्लो समय नेपाली टोलीले राम्रो नतिजा दिन सकिरहेको छैन । नेपाली टोलीले पछिल्लो समय जित भन्दा हार बढी व्यहोरेको छ । नेपालले पछिल्लो समय खेलेको सिरिजको नतिजाले त्यसै भन्छ । नयाँ प्रशिक्षकलाई हारको बानी परेको नेपाली टोलीको बानी तोड्नु चुनौती हुनेछ ।
-1753270648.jpeg)
