राखेपद्धारा क्यानसँग स्पष्टिकरण माग

काठमाडौं । राष्ट्रिय खेलकुद परिषद् (राखेप)ले नेपाल क्रिकेट संघ (क्यान)सँग स्पष्टिकरण माग गरेको छ । क्यानद्धारा आयोजित नेपाल टी ट्वान्टी लिगको सम्झौता र आयोजना विवादमा परेपछि राखेपले छानबिन कार्यदल गठन गरेको थियो । 

कार्यदलले दिएको सुझावका आधारमा राखेपले क्यानसँग स्पष्टिकरण माग गरेको हो । राखेपले माघ १८ गते पत्र लेख्दै सात दिनभित्र स्पष्टिकरण पेश गर्न क्यानलाई निर्देशन दिएको छ । 

परिषद् स्रोतका अनुसार राखेपले प्रचलित ऐन, कानुन विपरित गरिएको सम्झौता र श्रम स्विकृति बिना विदेशी खेलाडीलाई प्रतियोगितामा समावेश गरिएको विषय स्पष्टिकरणमा सोधिएको छ । राखेपले ७ दिनभित्र स्पष्टिकरण पेश गर्न भनेको छ । 

राखेपको छानबिन कार्यदलले विदेशी कम्पनीसँग सम्झौता गर्दा क्यानले प्रचलित कानुनको उल्लंघन गरेको निष्कर्श निकालेको थियो । सोही अनुसार सम्झौता रद्ध गर्ने लगायतका सुझाव कार्यदलले राखेप नेतृत्वलाई दिएको थियो । 

क्यानको आयोजनामा सञ्चालित फ्रेन्चाईज क्रिकेट प्रतियोगिता बेटिङ, फिक्सिङमा परेपछि राखेप, सिआईबी, अख्तियार र आईसीसीले अनुसन्धान प्रक्रिया अघि बढाएका थिए । सरकारलाई बेवास्ता गर्दै अपारदर्शी ढङ्गले प्रतियोगिता आयोजना गरेपछि क्यान विवाद र अनुसन्धानको घेरामा फसेको हो । 

सोही कारण क्यानका सचिव प्रशान्त बिक्रम मल्लले पदबाट राजीनामा दिएका थिए । तर क्यानकै असन्तुष्ट ७ केन्द्रिय सदस्यले अध्यक्ष सहित कार्यसम्पादन समितिको राजीनामा माग गर्दै आएका छन् ।

राखेपले भने आईसीसीलाई विश्वासमा लिएर क्यान निलम्बनको तयारी गरेको छ ।