ब्रिसबेनलाई हराउदै पर्थ च्याम्पियन 

काठमाडौं । पर्थ स्कोचर्सले अस्ट्रेलियामा सम्पन्न १२ औं संस्करणको बिग ब्यास लिग(बीबीएल)को उपाधी जितेको छ । 

शनिबार पर्थमा भएको फाइनल खेलमा ब्रिसबेन हिटलाई ५ विकेटले हराउँदै स्कोचर्सले पाँचौं पटक उपाधि जितेको छ।

हिटबाट जितका लागि पाएको १ सय ७६ रनको लक्ष्य पर्थले १९.२ ओभरमा ५ विकेट गुमाउँदै पूरा गर्यो ।

पर्थको जितमा कप्तान एश्टन टर्नरले ३२ बलमा ५ चौका र २ छक्कासहित सर्वाधिक ५३ रनको अर्धशतकीय ईनिङ खेले । 

जोस इंग्लिसले २६ रन बनाउँदा कुपर कोन्नोलीले ११ बलमा १ चौका र २ छक्कासहित २५ रनमा अविजित रहे । 

स्टेफन एस्किनाजी २१ रनमा आउट हुँदा निक होबसन १८ रनमा अविजित रहे । 

हिटका जेभियर बार्टलेट, स्पेन्सर जोनसन र म्याथ्यु कुहनेमनले समान १/१ विकेट लिए ।

त्यसअघि पहिला ब्याटिङ गरेको ब्रिसबेन हिटले २० ओभरमा ७ विकेट गुमाउँदै १ सय ७५ रन बनाएको थियो । 

ब्रिसबेनका नाथन म्याकस्वीनीले ३७ बलमा ३ चौका र १ छक्का सहयोगमा ४१ रन बनाए । 

साम हेजलेट ३४ रनमा आउट हुँदा म्याक्स ब्रायन्ट ३१ रनमा आउट भए । जोश ब्राउन २५ रनमा आउट हुँदा साम हाइन २१ रनमा अविजित रहे ।

पर्थको जासन बेहरनडोफ र म्याथ्यु केलीले समान २/२ तथा डेविड पेनी,आरोन हार्डडाई र एन्ड्रु टायले समान १/१ विकेट लिए । 

पर्थले लगातार दोस्रो पटक उपाधि जितेको हो ।