क्यान बोर्ड बैठक : अध्यक्ष चन्दको राजीनामा माग

काठमाडौं । नेपाल क्रिकेट संघ (क्यान) को बोर्ड बैठकमा क्यान अध्यक्ष चतुर बहादुर चन्दको राजीनामा माग भएको छ।

पोखरामा जारी क्यानको बोर्ड बैठकमा ७ जना केन्द्रीय सदस्यहरुले अध्यक्ष चन्दको राजीनामा माग गरेका हुन् ।

७ केन्द्रीय सदस्यले अध्यक्षसहित कार्यसम्पादन समितिका प्रशान्त विक्रम मल्ल, रोशन सिंह, दुर्गाराज पाठक र पदक खड्काको पनि राजीनामा माग गरेका छन् ।

बैठकमा अध्यक्षसहित कार्यसम्पादन समितिको लिखित रुपमा राजीनामा मागको पत्र बुझाएको केन्द्रीय सदस्य छुम्बी लामाले खेलपाटीलाई जानकारी दिए ।

केन्द्रीय सदस्य ऋषिराम गौतम, दाउद अन्सारी, संजयराज सिंह, करण महतरा क्षेत्री, अमितवीर पाण्डे, छुम्बी लामा र धर्मराज गिरीले राजीनामा माग गरेका हुन् ।

उनीहरुले आइतबार पत्रकार सम्मेलन गर्दै कार्य सम्पादन समितिको राजीनामा माग गरेका थिए ।

नेपाल टी-ट्वान्टी लिगमा देखिएको पछिल्लो विवादमा कार्यसम्पादन समितिको कमजोरी भएको भन्दै उनीहरुको राजीनामा माग गरिएको हो ।

राजीनामा मागको पत्र बुझाएपछि ७ केन्द्रिय सदस्यले बैठक समेत बहिस्कार गरेका छन् ।

पोखरामा बसिरहेको क्यान बोर्ड बैठकमा १७ वटा एजेन्डामा छलफल हुनेछ ।

जसमध्ये मुख्य एजेन्डा नेपाल टी-ट्वान्टी लिग प्रतियोगिता सम्बन्धि रहेको छ ।

त्यस्तै पूर्व कप्तान सन्दीप लामिछानेको निलम्बन फुकुवाको विषयमा छलफल हुनेछ ।