काठमाडौं । नेपाल क्रिकेट संघ (क्यान) ले पोखरा रंगशाला हातमा रहेको पोखरा क्रिकेट मैदानको स्तरोन्नतिका लागि छलफल गरेको छ ।
क्यानको बोर्ड बैठकका लागि पोखरा पुगेका क्यान पदाधिकारीले मंगलबार क्रिकेट मैदान स्तरोन्नतिका लागि गण्डकी प्रदेश सरकारका खेलकुद मन्त्री पच्चराम गुरुङ, राखेप बोर्ड सदस्य राजेश गुरुङ लगायतको टिमसँग छलफल गरेको हो ।
क्यानका अध्यक्ष चतुर बहादुर चन्दसहित कार्यवाहक सचिव प्रशान्त विक्रम मल्ल, कोषाध्यक्ष रोशन सिंह लगायतका टोलीले छलफल र मैदान अवलोकन गरेका थिए ।
क्यानको बोर्ड बैठक आज मंगलबार पोखरामा बस्दैछ ।
बोर्ड बैठकमा १७ वटा एजेन्डामा छलफल हुनेछ ।
जसमध्ये मुख्य एजेन्डा नेपाल टी-ट्वान्टी लिग प्रतियोगिता सम्बन्धि रहेको छ ।
त्यस्तै पूर्व कप्तान सन्दीप लामिछानेको निलम्बन फुकुवाको विषयमा छलफल हुनेछ ।
