गिलले गरे बाबरको कीर्तिमानसँग बराबरी

काठमाडौं । भारतीय ओपनर शुभमन गिलले पाकिस्तानी कप्तान बाबर आजमले बनाएको दुर्लभ कीर्तिमानको बराबरी गरेका छन् ।

गिलले बाबरको तीन खेलको एकदिवसीय सिरिजमा सर्वाधिक रन बनाउने ब्याटरको कीर्तिमान बराबर गरेका छन् ।

गिलले मंगलबार सम्पन्न न्युजिल्याण्डविरुद्धको तीन खेलको एकदिवसीय सिरिजमा ३ सय ६० रन बनाउँदै अजामले २०१६ मा वेस्ट इण्डिजविरुद्ध बनाएको कीर्तिमानसँग बराबरी गरेका हुन् ।

गिलले मंगलबार भएको खेलमा ७८ बलमा १ सय १२ रन बनाउँदै उनले बाबरको कीर्तिमानसँग बराबरी गरेका हुन् ।

यसअघि हैदरावादमा भएको सिरिजको पहिलो खेलमा २ सय ८ रन तथा दोस्रो खेलमा ४० रन बनाएका थिए ।

बाबरले २०१६ वेस्ट इण्डिजविरुद्धको तीन खेलको सिरिजमा ३ शतक सहित ३ सय ६० रन बनाएका थिए । सारजाहमा भएको पहिलो र दोस्रो खेलमा बाबरले क्रमशः १ सय २० र १ सय २३ तथा आबुधाबीमा भएको तेस्रो खेलमा १ सय १७ रन बनाएका थिए ।

गिल कम उमेरमा दोहोरो शतक बनाउने खेलाडी समेत हुन् । उनले यो कीर्तिमान २३ वर्ष १ सय ३२ दिनमा बनाएका थिए ।