काठमाडौं । अखिल नेपाल फुटबल संघ (एन्फा) ले विश्व फुटबलकै लेजेन्ड ब्राजिलियन पेलेको निधनको शोकमा देशभरका फुटबल प्रतियोगितामा एक सातासम्म एक मिनेट मौन धारण गर्ने निर्णय गरेको छ ।
एन्फाले जिल्ला फुटबल संघ, क्लब, प्रतियोगिता आयोजकलाई एक हप्तासम्म हरेक खेलमा एक मिनेट मौन धारण गर्न पत्र पठाएको छ ।
एन्फाले विश्व फुटबलको सर्वोच्च निकाय फिफाको निर्देशन अनुसार जिल्ला संघ, क्लब र आयोजकलाई पत्र पठाएको हो ।
पेलेको शुक्रबार ८२ वर्षको उमेरमा निधन भएको थियो ।
तीनपटक विश्वकप जित्ने एकमात्र खेलाडी पेले पछिल्लो समय क्यान्सर रोगबाट पीडित थिए ।
पेले ब्राजिलका सर्वाधिक गोलकर्ता हुन् । उनले ९२ खेलमा ७७ गोल गरेका छन् ।
पेले चारवटा विश्वकपमा गोल गर्ने खेलाडी मध्येका एक हुन् ।
पेलेले सन् १९५८, १९६२ र १९७० मा ब्राजिलका लागि विश्वकप उपाधि जितेका थिए ।
पेलेले २१ वर्षे फुटबल करियरमा कीर्तिमानी १ हजार ३६३ खेलमा १ हजार २८१ गोल गरेका थिए ।
पेलेलाई सन् २००० मा फिफा प्लेयर अफ द सेन्चुरीको उपाधिबाट सम्मानित गरिएको थियो ।
