आहा ! रारा पोखरा गोल्डकप : पुलिस र चर्च ब्वाइज भिड्दै

सबिन रेग्मी

पोखरा ।  २२ औं संस्करणको आहा ! रारा पोखरा गोल्डकपमा आज शुक्रबार नेपाल पुलिस क्लब र चर्च ब्वाइज युनाइटेड फुटबल क्लबबीच  प्रतिस्पर्धा हुँदैछ  ।

पोखरा रंगशालामा आयोजना हुने  खेल दिउसो २ बजे पछि सुरु हुने आयोजक साहरा क्लब पोखराले जनाएको छ ।

आजको खेलमा दुबै टोली जित निकाल्दै क्वाटरफाइनल प्रवेशको दाउमा हुनेछन् ।  यस खेलको विजेताले क्वाटरफाइनलमा मछिन्द्र क्लबसँग प्रतिस्पर्धा गर्ने छ ।

हिमश्री फुड्स प्रा. लि. को उत्पादन आहा तथा रारा तयारी चाउचाउको मुख्य प्रायोजनमा जारी प्रतियोगितामा १० टोलीको सहभागिता रहेको छ ।

यस पटक साविक विजेता एपीएफ क्लब, त्रिभुवन आर्मी फुटबल क्लब, धरान फुटबल क्लब, मनाङ मर्स्याङ्दी क्लब, मछिन्द्र फुटबल क्लब, चर्च ब्वाइज युनाइटेड फुटबल क्लब, भुटनिज युथ स्पोर्ट्स क्लब युएसए, नेपाल पुलिस क्लब, संकटा क्लब र सहारा क्लब पोखराको सहभागिता रहेको छ ।

यस पटक पुरस्कार राशिमा वृद्धि गरिएको आयोजकले जनाएको छ। प्रतियोगिताको विजेताले १२ लाख र उपविजेताले ६ लाख पाउने छन् । यस्तै विधागततर्फ उत्कृष्ट पाँचले जनही २५ हजार, सर्वाधिक गोलकर्ताले २५ हजार र म्यान अफ द म्याचले ८ हजार पाउने छन्।

प्रतियोगिता हेर्न आउने दर्शकका लागि टिकट मूल्य राखिएको छ । सामान्य प्यारापिटतर्फ प्रि–क्वाटरफाइनल र क्वाटरफाइनलको टिकट मूल्य १ सय, सेमिफाइनलमा २ सय र फाइनलका लागि ३ सय टिकट मूल्य राखिएको छ । भिआईपीतर्फ २ सय, ४ सय र ५ सय टिकट मूल्य राखिएको छ ।

प्रतियोगितामा वचत रकम क्लबबाट संचालित सुर्य बहादुर के. सी. स्मृती सहारा फुटबल एकेडेमीमा खर्च गरिने छ । हाल तेश्रो व्याचको एकेडेमीमा १० जिल्लाका १३ जना आश्रित रहेका छन् ।