मधेशलाई पराजित गर्दै सुदुरपश्चिम फाईनलमा

काठमाडौं । यू-१९ राष्ट्रिय क्रिकेट प्रतियोगितामा मधेश प्रदेशलाई पराजित गरि सुदुरपश्चिम प्रदेश एक खेल अगावै फाईनल पुगेको छ । 

फाईनलमा स्थान सुरक्षित गर्ने क्रममा सुदुरपश्चिमले मधेशलाई ७ विकेटले पराजित गरेको हो । 

मधेशले सुदुरपश्चिमलाई जितका लागि १ सय २३ रनको लक्ष्य दिएकोमा सुदुरपश्चिमले १८.५ ओभरमा ३ विकेट गुमाएर लक्ष्य पुरा गर्यो ।  

सुदुरपश्चिमको जितमा दिपक बोहोराले ५८ बलमा ५३ रनको अर्धशतकीय ईनिङ खेले । दीपक बोहोराले २४ रन जोड्दा गजेन्द्र बोहोराले १० बलमा अविजित २३ रन जोडे । 

मधेशका लागि अविशेक तिवारीले २ तथा साइमन रोयले १ विकेट लिए । 

टियु क्रिकेट मैदानमा भएको खेलमा पहिले ब्याटिङ गरेको मधेशले ३८.१ ओभरमा अलआउट हुदै १ सय २२ रन बनाएको थियो । 

मधेशका लागि अलि अन्सारीले ५६ बलमा ३२ रन जोड्दा इम्रान शेखले २८ रन जोडे ।

मयन यादवले २३ तथा डब्लु मल्लिकले ११ रन बनाए ।

मधेशका अन्य ब्याटरले दोहोरो अंकमा समेत रन बनाउँन सकेनन् ।

सुदुरपश्चिमका लागि नरेन साउदले ९.१ ओभरमा २४ रन खर्चिएर ५ विकेट लिए । हेमन्त धामीले ३ तथा युवराज खत्रीले २ विकेट लिए ।

अपराजित सुदुरपश्चिम आजको खेलमा जित हात पारेर एक खेल अगावै फाईनल पुगेको छ । पाँच खेलबाट सुदुरपश्चिमको १० अंक भएको छ । 

मधेश प्रदेश चार खेल अंक बिहिन रहेर अंक तालिकाको पुछारमा रहेर प्रतियोगिताबाट बाहिरिसकेको छ । 

प्रतियोगितामा प्रदेश-१, मधेश प्रदेश,बागमती प्रदेश,गण्डकी प्रदेश,लुम्बिनी प्रदेश,कर्णाली प्रदेश र सुदुरपश्चिम प्रदेशको सहभागिता रहेको छ । 

सिंगल राउन्ड रोविनपछि शीर्ष दुई टोली मंसिर १९ मा फाइनल खेल्नेछन् ।

प्रतियोगिताको विजेताले २ लाख नगद प्राप्त गर्दा उपविजेताले १ लाख नगद पाउने छन् ।

यस्तै प्लेयर अफ द सिरिज बन्ने खेलाडीले १५ हजार तथा उत्कृष्ट बलर र ब्याट्सम्यानले १०/१० हजार पाउने छन् ।