काठमाडौं । नेपाली राष्ट्रिय फुटबल टिमका फरवार्ड अन्जन विष्टले आफु गोलका लागि नभई टिमको जितका लागि खेल्ने गरेको बताएका छन् ।
त्रिपुरेश्वरस्थित दशरथ रंगशालामा बुधबार भएको मैत्रीपूर्णमा पाकिस्तानलाई १-० ले हराउँदा अन्जनले निर्णायक गोल गरेका थिए ।
खेलपछि अन्जनले आफुले अझै धेरै खेल्न बाँकी रहेको बताउँदै सर्वाधिक गोलकर्ताका लागि नभई जितका लागि खेल्न गरेको बताए ।
'मैले मेरो कमजोरी सुधार गरेको कारण गोल निस्किएको हो । सर्वाधिक गोलकर्ताको लागि खेले भने अड्किन्छु होला,' खेलपछि उनले भने, 'पहिले म जितका लागि खेल्छु । अझै धेरै खेल खेल्न बाँकी छ । त्यसैले जितका लागि खेल्छु ।'
नेपालको लागि अन्जनको यो ११ औं अन्तराष्ट्रिय गोल हो । अन्जन नेपालका लागि सर्वाधिक गोलकर्ता हरि खड्का र निराजन राइमाझी भन्दा दुई गोलले पछि रहेका छन् ।
अन्जनले जितको श्रेय टिम र दर्शकलाई दिए ।
'यो अन्तिम हैन । यात्रा धेरै लामो छ । आज जित निकाल्यौं । यसको श्रेय प्रशिक्षक, सम्पूर्ण खेलाडी, खेल हेर्न यहाँ आउनु भएका सम्पूर्ण दर्शकलाई दिन चाहन्छु,' उनले भने ।
