काठमाडौं । घरेलु टोली नेपालले पाकिस्तानविरुद्धको मैत्रीपूर्ण खेलका जित हासिल गरेको छ ।
त्रिपुरेश्वरस्थित दशरथ रंगशालामा बुधबार भएको खेलमा नेपालले पाकिस्तानलाई १-० गोल अन्तरले हराएको हो ।
दशरथ रंगशालामा ५० औं खेल खेलेको नेपाललाई जित दिलाउन अन्जन विष्टले निर्णायक गोल गरे ।
पहिलो हाफ गोलरहित बराबरीमा सकिएको खेलको ८२ औं मिनेटमा अन्जनले गोल गरेका हुन् । अन्जनले सब्सिच्युड खेलाडी सुनिल बलको लामो पासमा उत्कृष्ट गोल गरे ।
नेपालको लागि अन्जनको यो ११ औं अन्तराष्ट्रिय गोल हो । अन्जन सर्वाधिक गोलकर्ता हरि खड्का र निराजन राइमाझी भन्दा दुई गोलले पछि रहेका छन् ।
रंगशालामा अन्जनले लगातार दोस्रो खेलमा गोल गरेका हुन् । अन्जनले गत असोजमा बंगलादेशविरुद्ध रंगशालामा ह्याट्रिक गरेका थिए ।
अन्जन खेलको प्लेयर अफ द म्याच समेत चुनिए ।
यस जितसँगै नेपालले दशरथ रंगशालामा ५० औं खेलको कोशेढुंगा समेत पूरा गरेको छ ।
नेपालले सन् १९८४ बाट दशरथ रंगशालामा आधिकारिक रुपमा पहिलो अन्तर्राष्ट्रिय फुटबल खेलेको थियो ।
सन् १९८४ मा आयोजना भएको पहिलो दक्षिण एसियाली खेलकुद अन्तर्गत सेप्टेम्बर १८ मा नेपालले दशरथ रंगशालामा पहिलो औपचारिक खेल खेलेको हो । जुन खेलमा नेपालले माल्दिभ्सलाई ४-० ले हराएको थियो ।
यस्तै नेपालले पाकिस्तानविरुद्ध पाँचौ जित निकाल्न सफल भएको छ । नेपालले पाकिस्तानलाई १४ वर्षपछि हराएको हो।
नेपालले सन् २००८ पछि पहिलो पटक पाकिस्तानविरुद्ध जित निकालेको हो ।
नेपालले पछिल्लो पटक पाकिस्तानसँग २०१८ मा खेलेको थियो । साफ च्याम्पियनसिप अन्तर्गत ढाकामा भएको खेलमा नेपाल २-१ ले पराजित भएको थियो ।
पाकिस्तान फिफाको निलम्बनबाट फुकुवापछि पहिलो अन्तराष्ट्रिय खेल खेल्नका लागि नेपाल आएको हो ।
नेपालविरुद्धको खेलसँगै पाकिस्तान अन्तराष्ट्रिय फुटबलमा फर्किएको छ ।
त्यस्तै नेपालका मुख्य प्रशिक्षक प्रवेश कटुवालले आफ्नो डेब्यु खेलमै नेपाललाई जित दिलाएका छन् ।
अखिल नेपाल फुटबल संघ (एन्फा) ले पाकिस्तानसँगको मैत्रीपूर्ण खेलका लागि प्रवेशलाई मुख्य प्रशिक्षक नियुक्त गरेको हो ।
