नेपाल र पाकिस्तानबीचको खेलको टिकट इसेवा, खल्ती र आईएमई पे बाट किन्न सकिने

काठमाडौं । नेपाल र पाकिस्तानबीच हुने एक मैत्रीपूर्ण खेलको टिकट विभिन्न डिजिटल वालेट कम्पनि खल्ती, इसेवा र आईएमई पे बाट किन्न सकिने भएको छ ।

टिकट बिक्रीको अधिकार पाएको फुटसल भिलेज प्रालिले सोमबार एक विज्ञप्ति निकाल्दै खेलको टिकट खल्ती, इसेवा र आईएमई पे बाट किन्न सकिने जनाएको छ ।  

'मैत्रीपूर्ण खेलको टिकट बिक्रीको अधिकार फुटसल भिलेज प्रालिले प्राप्त गरेको छ,' निर्देशक थमन भुसालले जारी गरेको विज्ञप्तिमा भनिएको छ, 'टिकट डिजिटल वालेट कम्पनि खल्ती, इसेवा र आईएमई पे बाट किन्न सकिनेछ ।'

त्रिपुरेश्वरस्थित दशरथ रंगशालामा हुने नेपाल र पाकिस्तानबीचको खेल कात्तिक ३० गते बुधबार हुनेछ। खेल साँझ ५:३० बजे सुरु हुनेछ।

अखिल नेपाल फुटबल संघ (एन्फा) ले सामान्य प्यारापिटतर्फ ५ सय , भिआइपीतर्फ १ हजार र ५ हजारको टिकट मूल्य तोकेको छ ।

टिकट काटेर हेर्ने एक भाग्यशाली दर्शकले कतारमा आयोजना हुने फिफा विश्वकप फुटबल अन्तर्गत ब्राजिल र क्यामरुनबीचको खेलको टिकट प्राप्त गर्ने एन्फाले जनाएको छ ।  विजेता गोलापर्थाद्वारा छनोट गरिनेछ ।

मैत्रीपूर्ण खेलका लागि पाकिस्तानी टोली नेपाल आईसकेका छन्  ।