नेपाल टी-ट्वान्टी : ६ टोलीले किने १५ लाखमा मार्की खेलाडी

काठमाडौं । नेपालको आधिकारिक फ्रेन्चाइज क्रिकेट प्रतियोगिता नेपाल टी-ट्वान्टी लिगमा सहभागिता जनाउने ६ टोलीले मार्की खेलाडी अनुबन्ध गरेको छ ।

नेपाल क्रिकेट संघ (क्यान) ले खेलाडी ड्राफ्टबाट शनिबार ६ टोलीले पहिलो चरणमा मार्की खेलाडी अनुबन्ध गरेको जनाएको हो ।

पहिलो संस्करणको प्रतियोगितामा काठमाडौं कान्तिपुर, लुम्बिनी अल स्टार्स, विराटनगर सुपर किङ्स, जनकपुर रोयल्स, पोखरा एभेन्जर्स र फारवेस्ट युनाईटेडले प्रतिस्पर्धा गर्ने छन् ।

काठमाडौं कान्तिपुरले मार्की खेलाडीमा ज्ञानेन्द्र मल्ल, लुम्बिनीले दीपेन्द्र सिंह ऐरी र विराटनगरले मार्की खेलाडीमा रोहित पौडेललाई अनुबन्ध गरेको छ ।

यस्तै जनकपुरले सोमपाल कामी, पोखराले आसिफ शेख र फारवेस्टले करण केसीलाई मार्की खेलाडी चयन गरेको छ।

ड्राफ्टबाट ६ वटै टोलीले 'ए' श्रेणीका खेलाडीलाई १५ लाखमा मार्की खेलाडीको रुपमा अनुबन्ध गरेको हो ।

यस्तै पोखराले ए श्रेणीका खेलाडी शरद भेषवाकरलाई अनुबन्ध गरेको छ ।

पहिलो दिन 'ए' श्रेणीका पाँच खेलाडी भने बिकेनन  ।

विनोद भण्डारी, अविनास बोहरा, आरिफ शेख, कुशल भुर्तेल र सुबास खकुरेल  नबिकेका हुन् । उनीहरु 'बी' श्रेणीमा झरेका छन् ।

बाँकी ९२ जनाको ड्राफ्ट आइतबार हुनेछ ।

पहिलो संस्करणको नेपाल टी-ट्वान्टी असोज ८ देखि कात्तिक ५ गतेसम्म आयोजना हुनेछ ।