म्यानेजरमा अनिल : राइट ‘म्यान’, राइट ‘प्लेस’ 

काठमाडौं । अखिल नेपाल फुटबल संघ (एन्फा)ले आईतबार राष्ट्रिय फुटबल टिमको म्यानेजरमा अनिल श्रेष्ठलाई नियुक्त गरेको छ । एन्फामा नयाँ नेतृत्व आएपछि निकै महत्वपुर्ण मानिएको राष्ट्रिय टिमको म्यानेजरको जिम्मेवारीमा अनिललाई नियुक्त गरिएको हो । 

अनिल लिग च्याम्पियन क्लब मछिन्द्रका उपाध्यक्ष हुन् । तर उनको परिचय मछिन्द्रको म्यानेजरको रुपमा बढी चर्चामा हुने गर्छ । घरेलु फुटबलमा पछिल्ला केही वर्ष मछिन्द्र क्लबको दबदबा छ । लगातार दुई पटक लिग उपाधि जितेर मछिन्द्रले घरेलु फुटबलमा आफुलाई नयाँ शक्तिको रुपमा प्रस्तुत गरेको छ । मछिन्द्रको पछिल्लो सफलताका सुत्राधार अनिलले राष्ट्रिय टिमको व्यवस्थापनको जिम्मेवारी पाएका हुन् । 

‘एन्फाबाट पटक पटक अनुरोध आयो । अध्यक्षले पनि अनुरोध गर्नुभयो । एक्कासी यो जिम्मेवारी लिन पर्यो ।’ अनिलले खेलपाटीसँग भने । ‘धेरै विचार गरेर एन्फाले जिम्मेवारी दिएको हुनुपर्छ । यो पहिलो अनुभव पनि हो । क्लबको व्यवस्थापन गरे जस्तो राष्ट्रिय टिम हुदैन । फरक हुन्छ होला । राम्रै गर्छु भन्ने लागेको छ ।’ उनले थपे । 

घरेलु फुटबलमा मछिन्द्रको सफलताका केही सुत्र छन्, जुन अनिलले लागु गरेका हुन् । क्लबमा ठुला प्रायोजकसँग सम्झौता, खेलाडीलाई राम्रो तलब, लिग अवधिभर बस्ने, खाने र अभ्यासको राम्रो व्यवस्था अनि खेलाडीलाई लक्ष्य हासिल गर्न गरिने प्रेरणादायी गतिविधि । यही सुत्रले मछिन्द्रले घरेलु फुटबलमा एक पछि अर्को सफलता प्राप्त गरिरहेका छ । खेलाडीलाई खुसी बनाएर राख्ने अनिलको कलाले मछिन्द्रको पछिल्लो उपाधि यात्रामा सहयोग गरेको छ । 

अनिलले प्राप्त गरेको यही सफलता र नतिजामा आधारित रहेर एन्फाले अनिललाई राष्ट्रिय टिमको व्यवस्थापकको जिम्मेवारी दिएको छ । अनिल पनि यसअघि राष्ट्रिय टिमको म्यानेजरका लागि इच्छुक थिए । एन्फाको पछिल्लो निर्वाचनमा अनिलले कर्माछिरिङ शेर्पा प्यानलबाट कार्यसमिति सदस्यमा उम्मेदवारी दिएका थिए । तर उनी पराजित बन्न पुगे । फरक प्यानलबाट निर्वाचन लडेका अनिल नेम्वाङ नेतृत्वको राष्ट्रिय टिमको जिम्मेवारीमा किन आए त ? ‘एन्फाको निर्णयले राम्रो सन्देश दिएको छ । चुनाव भनेको अलग कुरा हो । देशका लागि जिम्मेवारी लिने फरक कुरा हो । हरेक विषयलाई राजनीतिको आँखाले हेरेर हुदैन ।’ उनी भन्छन् । 

सार्वजनीक जिवनमा आफुलाई प्रमाणित गरेका व्यक्तिले सार्वजनीक संस्था र निकायमा अवसर विरलै पाउने गर्छन् । फुटबल संघ जस्तो राजनीतिक रुपमा ग्रस्त संस्थामा अब्बल र सक्षम मान्छेले जिम्मेवारी कमै पाउँने गर्छन् । क्लब फुटबलमा आफुलाई प्रमाणित गरेका अनिललाई जिम्मेवारी दिएर एन्फाले सही मान्छेलाई सहित स्थानमा पुर्याउने सन्देश दिएको छ । अर्को कुरा ए डिभिजनका ठुला क्लब वर्तमान कार्यसमिति बाहिर रहदाँ आसन्न लिग गर्न एन्फालाई गाह्रो पर्ने ठानिएको छ । 

अनिलको आगमनले आसन्न लिग सञ्चालन गर्ने सन्दर्भमा एन्फालाई केही सजिलो हुने निश्चित छ । नत्र बी, सी डिभिजन क्लब चलाउन नसक्ने पदाधिकारीलाई राष्ट्रिय फुटबल टिमको म्यानेजरको जिम्मेवारी दिएर जग हसाँउने काम एन्फामा हुदै आएको छ । क्लब फुटबलमा आफुलाई सफल व्यवस्थापकको रुपमा प्रमाणित गरेका अनिलले राष्ट्रिय टिममा के फरक काम गर्लान् त ? ‘क्लबले सपोर्ट गरेरनै घरेलु फुटबलमा मछिन्द्रलाई सफल बनाउन सकेको हो । एन्फाले आवश्यक सहयोग गर्यो भने राष्ट्रि टिम पक्कै केही फरक देखिनेछ ।’ अनिलले भने ।