यूईएफए सुपरकप : रियल फ्रायन्कफर्टको सामना गर्दै

काठमाडौं । रियल मड्रिड चाहन्छ, युरोपेली क्लब फुटबलको शिखरमा रहेको आफू तल नझरोस । यही रियलले बुधबार राति नयाँ सिजन औपचारिक रूपमा सुरु गर्दैछ, इन्ट्राख्ट फ्रायन्कफर्टविरुद्ध । अवसर हो, यूईएफए सुपरकप । अहिलेसम्म चार पल्ट युरोपेली च्याम्पियन्स लिग जित्ने एक मात्र प्रशिक्षक हुन्, कार्लो एन्सेलोटी । गत सिजन रियलले लिभरपुललाई फाइनलमा हराएर उपाधि चुमेको थियो । यिनै एन्सेलोटी चाहन्छन्, रियलको स्थान अरू कसैले नलिओस ।

उनले भर्खरै भनेका छन्, ‘जितले असिम चाहनाले प्रत्येक पल्ट राम्रो खेल्ने प्ररित गर्छ ।’ एन्सेलोटीकै नेतृत्वमा रियलले गत सिजन कीर्तिमान ३५ औं पल्ट स्पेनी ला लिगा पनि जितेको थियो । यी दुवै रियलका लागि उनको दोस्रो बसाईका उपलब्धी थिए । फाइनलमा लिभरपुललाई हराउन अगाडि रियले पेरिस सेन्ट जर्मेन (पीएसजी), चेल्सी र म्यानचेस्टर सिटीविरुद्ध अभुतपूर्व रूपमा एकपछि अर्को पुर्नआगमन जित रच्न सफल भएको थियो ।

‘हामी कहिले पनि हार खाने टिम होइनौं । प्रत्येक प्रतिद्वन्द्वीविरुद्ध हामी कडा चुनौती पेस गर्छौ,’ एन्सेलोटी थप्छन् । त्यसको अर्थ के हो भने पोहोर सिजनको युरोपा लिग विजेता जर्मन टिम फ्रायन्कफर्टविरुद्धको खेललाई रियल हल्का लिने पक्षमा छैन् । अनि यही बेला अर्को तथ्य के पनि हो भने रियल यही फ्रायन्कफर्टलाई हराएर यूईएफए सुपरकप जित्न पनि उत्तिकै चाहन्छ । एन्सेलाटी पनि मान्छन्, ‘फ्रायन्कफर्टका लागि गत सिजन विशेष रह्यो ।’

बुधबारको खेल नेपाली समय अनुसार पौने एक बजे हेलसिन्कीको ओलम्पिक स्टेडियममा हुनेछ । सुपरकपमा फ्रायन्फर्टको यो डेब्यु खेल पनि हुनेछ । सन् १९६० मा अन्तिम पटक औपचारिक खेलमा उसले रियलको सामाना गरेको थियो र अवसर थियो, युरोपेलीकप फाइनल । त्यसमा रियल ७–३ ले विजयी रहेको थियो । त्यसयता विश्व फुटबलमा धेरै उतारचढाव आए, धेरै थोक परिवर्तन पनि भए । तर यी दुई क्लबबीचको खेलको साइत भने भर्खर जुरेको छ ।

रियल आफै भने आठौं पल्ट सुपरकपमा खेल्दैछ र त्यसमध्ये चार अवसरमा उनले उपाधि जितेको पनि छ । एन्सेलोटी त सुपरकपमा अपराजित प्रशिक्षक हुन् । उनले यस अगाडि एसी मिलानका लागि दुई पल्ट र रियलका लागि एकपल्ट यो उपाधि जितिसकेका छन् । यो खेल अगाडि फ्रायन्कफर्टलाई एउटा के फाइदा छ भने जमर्न घरेलु लिग सुरु भइसकेको छ र त्यसैले टिमले आफूलाई लयमा ल्याउन केही बढी समय पाएको छ, रियलको तुलनामा ।

त्यसैले एन्सेलोटी फ्रायन्कफर्टलाई केही बलियो मान्छन् । तर यो उनले खेलेको ‘माइन्ड गेम’ पनि हो, आफ्नो विपक्षी टिमलाई उस्काउने । यो सबै कुरा निकै राम्रोसँग बुझेका खेलाडीमा पर्छन्, फ्रायन्कफर्टका गोलरक्षक केभिन ट्राप । उनी भन्छन्, ‘रियलसँग युरोपमा खेल्नुको अनुभव जति छ, अरू कोहीसँग पनि छैन् । त्यसैले जति बेला रियल युरोपमा खेल्छ, यो सबै बलियो हुन्छ ।’ फ्रायन्कफर्टले युरोपा लिग जित्ने क्रममा सुरुमा बार्सिलोनालाई पन्छाएको थियो ।

त्यसपछि फाइनलमा सेभियालाई हराएको थियो । ट्राप भन्छन्, ‘हामी त्यस्तो टिम हौ, जसकाविरुद्ध खेल्न जो कोहीलाई पनि गाह्रो हुन्छ । यसको कारण हो, हामी मैदानमा खबै मिहिनेत गर्छौ र कहिले पनि हार खाँदैनौं । पक्कै पनि हामी रियललाई सम्मान दिन चाहन्छौं, तर त्यसको अर्थ हामी डराएको हो भन्ने पनि होइन् । फ्रायन्कफर्ट सुपरलिगसम्म पुगेको छ, त्यसको अर्थ यो टिममा पक्कै पनि केही छ । रियललाई हराएर सुपरकप जितिन्छ भने त्यो अद्धितीय हुनेछ ।’

–एएफपीको सहयोगमा ।