भुवनेश्वर । नेपाली यू-२० राष्ट्रिय फुटबल टिमका मुख्य प्रशिक्षक मेघराज केसीले भारतविरुद्धको खेलका लागि कुनै विशेष तयारी नगरेको बताएका छन् ।
साफ यू-२० च्याम्पियनसिप अन्तर्गत भारतसँगको खेल अघि संचारकर्मीसँग कुरा गर्दै मुख्य प्रशिक्षक केसीले साविक विजेताविरुद्ध विशेष तयारी नगरेको बताएका हुन् ।
'सबै टिमलाई हामीले समान मानेका थियौ त्यही अनुसार नै हामी भारतविरुद्ध खेल्ने छौ भारतका लागि हाम्रो विशेष तयारी भनेर केही छैन सबै टिमविरुद्ध उही नै हो,' मुख्य प्रशिक्षक केसीले भने, ' उमेर समूहको लागि दक्षिण एसियाका सबै टिम बराबर नै छौ। केही तल माथी मात्र नै छ जस्तो लाग्छ। खास फरक छैन।'
साफ यू-२० च्याम्पियनसिप अन्तर्गत नेपालले तेस्रो खेलमा भोलि (आइतबार) भारतको सामना गर्नेछ । कालिंगा स्टेडियममा नेपाल र भारतबीचको खेल साँझ ७:१५ बजे सुरु हुनेछ ।
मुख्य प्रशिक्षक केसीले भारतविरुद्ध जितकै लागि खेल्ने बताए ।
'भारतसॅंगको खेल हाम्रो लागि साख र प्रतिष्ठाको खेलको रुपमा समर्थकहरुले लिनु हुन्छ। तर हामी भने सकेको राम्रो खेल देखाउने हो र लक्ष्य जित नै रहनेछ। हाम्रो प्रदर्शन राम्रो हुनुपर्यो राम्रो नतिजा आउनु पर्यो,' उनले थपे ।
नेपाल र भारत दुबैका लागि यस खेल महत्वपूर्ण रहेको छ ।
नेपाल भारतलाई हराएर शीर्ष स्थानमा उक्लन चाहन्छ । भारत पनि नेपाललाई हराएर फाइनल पुग्ने सम्भावना बलियो बनाउन चाहन्छ ।
-1755401924.jpg)
