साफ यू-२० : सुखद सुरुआतको योजनामा नेपाल

भुवनेश्वर । साफ यू-२० च्याम्पियनसिप पुरुष फुटबल प्रतियोगिता भोलि (सोमबार) बाट सुरु हुँदैछ ।

च्याम्पियनसिपमा सहभागिता जनाउन भुवनेश्वर आईपुगेका नेपाली युवा टोली प्रतियोगिताका लागि तयार छन् ।

कालिंगा स्टेडियममा हुने उद्घाटन खेलमा नेपालले सोमबार माल्दिभ्सको सामना गर्नेछ । नेपाल र माल्दिभ्सबीचको खेल नेपाली समय अनुसार ४:१५ बजे सुरु हुनेछ ।

साफको फाइनल पुग्ने लक्ष्य लिएको नेपाल सुखद सुरुआतको योजनामा रहेको छ । नेपाल पहिलो खेलमै महत्वपूर्ण तीन अंक जोड्न चाहन्छ ।

'यस खेलका लागि हामीले मेहेनत गरेका छौँ । माल्दिभ्सविरुद्धको खेलमा हामीले ३ अंक प्राप्त गर्ने छौँ । हामी गोर्खाली हौँ अन्तिमसम्म फाइट गर्छौं,' माल्दिभ्ससँगको खेल अघि प्रि-म्याच कन्फरेन्समा  नेपाली टोलीका कप्तान आयुष घलानले भने,' हामीलाई गुमाउनु केहि छैन त्यसैले दबाबबिना खेल्छौं ।'

आयुष नेपली टोलीका सबैभन्दा अनुभवी खेलाडी हुन् । आयुष सिनियर राष्ट्रिय टोलीका नियमित सदस्य समेत हुन् ।

आयुषले राष्ट्रिय टोलीका लागि ७ खेलमा १ गोल गरिसकेका छन् ।

नेपाली टोलीका मुख्य प्रशिक्षक मेघराज केसीले तयारी राम्रो गरेको कारण प्रतियोगिताका लागि उत्कृष्ट टिम बनाएको बताए ।

'हामीले साढे एक महिना तयारी गरेका छौँ । तयारी राम्रो भएको छ तर, साफको उमेर समूहको टिमबारे अनविज्ञ छौँ । तर, साफका लागि हामीले उत्कृष्ट टिम बनाएका छौँ,' प्रशिक्षक केसीले भने ।

माल्दिभ्सका प्रशिक्षक अहमद साकिरले नेपाली टोलीको खेल कस्तो छ भनेर आफुलाई थाहा नभएको जनाए ।

'एउटा प्रशिक्षकको रुपमा त्यस्तो टोलीविरुद्ध खेल्नु कठिन हुन्छ जसको कुनै खेलको बारेमा अहिलेसम्म थाहा छैन । हाम्रो अधिकांश खेलाडीहरु माल्दिभ्सको‌ प्रिमियर लिगमा खेलिरहेका छन् । फिटनेसको हिसाबमा हामी अब्बल छौँ । किनकी खेलाडी लगातार खेलिरहेका छन् । हामिसँग भएको समय र स्रोतको हिसाबले तयारी राम्रो छ । हामी राम्रो गर्न सक्छौँ,' उनले भने ।

च्याम्पियनसिपमा आयोजक भारत र नेपालसँगै माल्दिभ्स, श्रीलंका र बंगलादेशको सहभागिता रहेको छ ।

नेपालले माल्दिभ्सपछि श्रीलंकासँग बुधबार खेल्नेछ । त्यस्तै भारतसँग आगामी आइतबार र र अन्तिम खेल बंगलादेशसँग आगामी मंगलबार प्रतिस्पर्धा गर्नेछ ।

शीर्ष दुई टोलीले उपाधिका लागि अर्को हप्ताको शुक्रबार प्रतिस्पर्धा गर्ने छन् ।

नेपाली टोली  :

गोलकिपर :  ईश्वर गुरुङ, उनेश चौधरी, जियारथ सेख

डिफेन्डर : अमर श्रेष्ठ, सोनित दाहाल, आयुष श्रेष्ठ, अजय चौधरी, सुमित श्रेष्ठ, सृजन धानी, रोशन थापा, अभिषेक वाइबा

मिडफिल्डर : दिपेश गुरुङ, आशिष राई, सन्दीप कार्की, जन्मजय धामी, मोहित गुरुङ, कृतिश रत्न छिन्जु, सुगम सुवाल, मनग्य नकर्मी, आयुष घलान

फरवार्डः रोहित सुब्बा, निरञ्जन मल्ल, रोहन खड्गी