आर्मीका रत्न सातौं पटक च्याम्पियन

काठमाडौं ।  त्रिभुवन आर्मी क्लबका रत्नजित तामाङले लगातार सातौं पटक पुष्पलाल स्मृती ब्याडमिन्टन प्रतियोगिताको उपाधि जितेका छन् । पुरुष एकलतर्फ शनिबार भएको आठौं संस्करणको फाइनलमा एपीएफ क्लबका दिपेश धामीलाई पराजित गर्दै रत्नले सातौं पटक उपाधि जितेका हुन् । 

त्रिपुरेश्वरस्थित कभर्डहलमा भएको फाइनलमा रत्नले दिपेशलाई २१-११ र २१-१६ को सेटमा पराजित गर्दै किर्तीमानी उपाधि जितेका हुन् । उपाधिसंगै रत्नले नगद ५० हजार प्राप्त गरेका छन् । दिपेशले २० हजार नगदमा चित्त बुझाए । तेस्रो भएका आर्मीका नविन श्रेष्ठ र रुकेश महर्जनले समान १०/१० हजार हात पारे ।

महिला एकलतर्फको उपाधि आर्मीकी नङ्गशल देवी तामाङ्गले जितिन् ।  फाइनलमा नङ्गशलले आर्मीकै रशिला महर्जनमाथि २२-२०, १५-२१ र २१-१८ को सेटमा जित निकालिन । उपाधिसंगै नङ्गशलले ५० हजार र उपविजेता महर्जनले २५ हजार प्राप्त गरे । तेस्रो भएका एपिएफका शोभा गौचन र जेशिका गुरुङ्गले समान १०/१० हजार प्राप्त गरे ।

पुरुष युगलतर्फ आर्मीका रत्नजित तामाङ्ग र नविन श्रेष्ठले उपाधि जिते । रत्न र नविनको जोडीले एपिएफका दिपेश धामी र बिजित थापा मगरको जोडीमाथि २२-२०, २०-२२ र २१-११ को कठिन जित निकाल्दै उपाधी जिते । आर्मीका रुकेश महर्जन र प्रफुल महर्जन तथा एपिएफका गौतम कठायत र सुनिल जोशीको जोडी तेस्रो स्थानमा रहे । शीर्ष  तीन स्थान प्राप्त गर्ने जोडीले नगद २०, १० र ५ हजार नगद प्राप्त गरे ।

महिला युगलतर्फ एपिएफका पुजा श्रेष्ठ र जेशिका गुरुङ्गको जोडीले उपाधी हात पार्यो । श्रेष्ठ र गुरङ्गको जोडीले आर्मीका नङ्गशल तामाङ्ग र रशिला महर्जनको जोडीलाई २१-१३, २१-१४ को सोझो सेटमा हराए ।   जेष्ट ब्याडमिन्टनकी सिता राई र बाँकेकी संझना शर्मा तथा आर्मीका मिता गिरी र अनुमाया राई जोडीले तेस्रो भए ।

यस स्पर्धामा शीर्ष तीन स्थान प्राप्त गर्ने जोडीले नगद २०, १० र ५ हजार नगद प्राप्त गरे ।

यू-१७ ब्वाईजतर्फ सिल्क ग्रुपका प्रिन्स दाहालले आर्मीका दिवस शंकरलाई २१-१६, २१-५ को सहज जित निकाल्दै उपाधि जिते । दाहालले नगद १५ हजार प्राप्त गर्दा दिवसले ७ हजार प्राप्त गरे ।

यसैगरि गल्र्सतर्फको आर्मीकी रशिला महर्जनले आफ्नै क्लबकी रञ्जना भट्टलाई २१-५, २१-५ ले पाखा लगाउँदै उपाधि हात पारिन् । महर्जनले नगद १५ हजार प्राप्त गर्दा रञ्जनाले नगद ७ हजार प्राप्त गरिन् ।

विजयी खेलाडीहरुलाई प्रमुख अतिथी राष्ट्रिय खेलकुद परिषदका सदस्य सचिव केशव कुमार बिष्ट लगायतले पुरस्कार वितरण गरेका थिए ।