एनएसएल : एन्फा अन्यौलमा, आयोजक लचिलो 

काठमाडौं । फ्रेन्चाइज फुटबल नेपाल सुपर लिग (एनएसएल)को आयोजनालाई लिएर विवाद पुन सुरु भएको छ । अखिल नेपाल फुटबल संघ (एन्फा)मा आएको नेतृत्व परिवर्तनसँगै घरेलु फुटबलको महत्वकांक्षी परियोजना विवादमा परेको छ । एन्फाको अघिल्लो कार्यसमितिले चार वर्षका लागि एनएसएल आयोजनाका लागि नेपाल स्पोर्टस म्यानेजमेन्ट एण्ड इभेन्ट कम्पनीसँग सम्झौता गरेको थियो । तर एन्फामा नयाँ नेतृत्व आएसँगै फ्रेन्चाइज फुटबल एनएसएलको भविष्य अनिश्चित देखिएको छ । एन्फाको नयाँ कार्यसमितिमा आएका नेतृत्व सहित अधिकांश पदाधिकारी एनएसएलप्रति अनुदार छन् । एनएसएललाई ‘गोल्डकप’को रुपमा सार्वजनीक अभिव्यक्ति दिने अधिकारीनै एन्फा चुनावमा वरिष्ठ उपाध्यक्षमा निर्वाचित भएर आएका छन् । 

नयाँ कार्यसमितिको पहिलो औपचारिक बैठक अघि एन्फाले एनएसएलप्रति असन्तुष्ट ए डिभिजनका चार क्लबसँग बैठक गरेको छ । बैठक अनुसार कतिपय बुँदामा गम्भिर त्रुटि रहेको निष्कर्श सहित एनएसएलसँगको सम्झौता पत्र रद्ध गर्ने निर्णय गर्दै कार्यसमितिमा प्रस्ताव लैजाने सहमती गरेको छ । पछिल्लो घटनाक्रमले एन्फा र एनएसएलबीच भएको सम्झौता रद्ध हुने भएको छ । 

एनएसएललाई लिएर एन्फाको वर्तमान नेतृत्व आफैै अन्यौलमा देखिन्छ । एन्फा नेतृत्व ए डिभिजनका चार ठुला क्लबलाई बिच्काउन नि चाहदैन । नेतृत्वलाई तीनै तीन क्लबको बलमा चुनाव जितेर आएको गुण सम्झिनु परेको छ । एनएसएल हुन दिदैन भनेर आयोजक नेपाल स्पोर्टस म्यानेजमेन्ट एण्ड इभेन्ट कम्पनीलाई पनि भन्न सकेको छैन । सहिद स्मारक ए डिभिजन लिग गर्न नसक्ने अवस्थामा रहेको एन्फा एनएसएललाई बिच्काएर थप दबाब खेप्न सक्ने अवस्थामा पनि छैन । 

क्लब र एन्फाको पछिल्लो सहमतीलाई लिएर आईतबार एनएसएलको आयोजक टिमले एन्फा नेतृत्वसँग छलफल गर्यो र स्पष्ट धारणा माग्यो । छलफलमा एन्फा पदाधिकारीले मिडियामा आए जस्तो विषय नभएको एनएसएलको आयोजक टिमलाई जानकारी गराएका थिए । तर कसरी अघि बढ्ने सन्दर्भमा स्पष्ट कुरापनि गर्न सकेनन् । एन्फाले कार्यसमितिको बैठक राखेर खबर गर्ने जवाफ एनएसएलका पदाधिकारीलाई गरेका छन् ।  

एन्फाले आसन्न असार २ गतेको कार्यसमिति बैठकमा एनएसएललाई एजेण्डाको रुपमा समावेश गरेको छ । सम्झौता रद्धको विषय कार्यसमितिबाट पास गराउने एन्फाको तयारी छ । तर नयाँ सम्झौता कसरी अघि बढाउने वा एनएसएल गर्ने-नगर्ने विषयमा एन्फा नेतृत्व आफै अन्यौलमा छ । छलफलमा एन्फा अध्यक्ष पंकजबिक्रम नेम्वाङले आफुहरु एनएसएलको विषयमा सकारात्मक रहेको बताएका थिए । ‘एनएसएल गर्ने पक्षमानै हो । तर यसलाई व्यवस्थित गरौं, मिलाएर गरौं । भोलिका दिनमा समस्या नहोस् भन्ने एन्फाको चाहना छ ।’ नेम्वाङको भनाइ उद्धित गर्दै बैठकले स्रोतले भन्यो । 

बैठकमा एनएसएल आयोजक टिमले सम्झौता रद्ध गरेर नयाँ सम्झौता अनुसार आफु अघि बढ्न तयार रहेको बताएका थिए । ‘एन्फाको वार्षिक क्यालेन्डर बनाएर जादा समस्या हुदैन । ए डिभिजनले कम्तिमा ६ महिना खेलाडीलाई राख्छ । एनएसएलले दुई, तीन महिना खेलाडीलाई अनुबन्ध गर्छ । यसले ए डिभिजन क्लबको आर्थिक भार पनि कम गर्छ ।’ एनएसएसका एक पदाधिकारीले भने । एनएसएल आयोजक टिमका सदस्यले प्रतियोगितामा आबद्ध १० वटा क्लबको भविष्यलाई हेरेर निर्णय लिन एन्फा नेतृत्वलाई सुझाएका थिए ।

दोस्रो संस्करणको एनएसएल भदौ २५ देखि कात्तिक ५ गतेसम्म आयोजना गर्ने तयारी गरिएको थियो । तर एन्फा भित्रको कुरुप राजनीतिको नजर एनएसएलमाथि लागेपछि प्रतियोगिताको भविष्य जोखिममा परेको छ । 

यो पनि, एसएसएलसँगको सम्झौता रद्ध गरिने