काठमाडौं । अखिल नेपाल फुटबल संघ (एन्फा) र फ्रेन्चाईज फुटबल नेपाल सुपर लिग (एनएसएल) बीचको सम्झौता रद्ध हुने भएको छ ।
एन्फा र असन्तुष्ट ए डिभिजन क्लबबीच शुक्रबार बसेको बैठकले एनएसएलसँगको सम्झौता रद्ध गर्ने निर्णय गरेको हो ।
एनएसएलसँग गरिएको सम्झौताको कतिपय बुँदामा त्रुटि देखिएको निष्कर्ष सहित सम्झौता रद्धका लागि सिफारिस गर्ने निर्णय बैठकले गरेको हो ।
'एनएसएल र एन्फाबीचको सम्झौतामा कतिपय बुदाहरु नमिल्ने थियो । त्यसैले सम्झौता खारेज गर्नुपर्ने भन्ने कुरा गर्यौं,' बैठकमा सहभागी थ्री स्टार क्लबका महासचिव सन्जिब शिल्पकारले भने, 'सम्झौता खारेज गर्नका लागि एन्फाको कार्यसमितिमा लैजाने सहमति भएको छ ।'
बैठकमा असन्तुष्ट चार क्लब थ्री स्टार, मनाङ मर्स्याङ्दी, संकटा र न्युरोड टिम (एनआरटी) का प्रतिनिधिको उपस्थिति रहेको थियो ।
फुटबलमा कर्पोरेट क्षेत्रको लगानी भित्र्याउने उद्धेश्य सहित चार वर्षअघि एन्फाले चौधरी ग्रुप स्वामित्वको नेपाल स्पोर्टस म्यानेजमेन्ट एण्ड इभेन्ट कम्पनीसँग एनएसएल आयोजनाको औपचारिक सम्झौता गरेको थियो । चार वर्षका लागि गरिएको सम्झौता दोस्रो संस्करण सुरु नहुँदै विवादमा पर्यो ।
कोभिडको प्रभावका बीच बन्द रंगशालामा पहिलो संस्करण सफलतापूर्वक सम्पन्न गरेर आयोजकले लोकप्रियता कमाएको थियो । तर दोस्रो संस्करण सुरु हुनुअघि ए डिभिजनका केही ठुला क्लबले प्रक्रिया पुरा नगरि आफ्ना खेलाडी अनुबन्ध गरिएको भन्दै एन्फा र एनएसएलसँग असन्तुष्टि जनाएका थिए । सोही असन्तुष्टिका कारण एनएसएलको दोस्रो संस्करण आयोजना हुन सकेन ।
दोस्रो संस्करण आयोजनासँगै सम्झौता खारेज हुने गरि एन्फाले अनुमती दिएको थियो । तर एनएसएल आबद्ध क्लबले प्रतियोगिताको दिर्घकालिन सुनिश्चितता नभएर सहभागी नहुने अडान राखे । त्यसपछि एन्फा निर्वाचनलाई केन्द्रित गर्दै आयोजकले भदौ २५ देखि कात्तिक ५ गतेसम्म दोस्रो संस्करण आयोजनको स्विकृती लिएको थियो ।
एन्फा नेतृत्वमा पंकजबिक्रम नेम्वाङ आए लगत्तै क्लबसँग छलफल गरेर मात्र एनएसएलबारे निर्णय दिने बताएका थिए । सोही अनुसार शुक्रबार एन्फा र असन्तुष्ट क्लब थ्री स्टार, मनाङ, संकटा र एनआरटीको बैठक बस्यो । क्लबहरुको असन्तुष्टिको कारण देखाउँदै एन्फाले एनएसएलसँगको सम्झौता रद्ध गर्ने निर्णय गर्दै कार्यसमितिमा प्रस्ताव लैजाने भएको छ ।
