महिला फुटसलको सेमिफाइनल समीकरण पूरा

काठमाडौं । लमजुङ जिल्लाको बेसीशहरमा जारी प्रथम महिला फुटसल प्रतियोगिताको सेमिफाइनल समीकरण पूरा भएको छ ।

लमजुङ फुटसलमा आइतबार समूह 'क' बाट बा.घे.ता लमजुङ समूह विजेता बन्दै अन्तिम चारमा प्रवेश गरेको छ  ।

लिग चरणमा ९ अंक जोडेर सेमिफाइनल पुगेको बा.घे.ताले लमजुङ फुटसललाई ४-०, एरिन फुटसल काठमाडौंलाई २-० र एक बाइ पाएको थियो ।

यस्तै समूह उपविजेता बनेको एरिन फुटसल काठमाडौंले ६ अंक जोड्यो । एरिनले लमजुङ फुटसललाई ७-० ले हराउँदा एक बाइ पाएको थियो ।

समूह 'ख' बाट मिनाम लाङघली ९ अंक जोडेर समूह विजेता बन्दा उपविजेता एक्स-गोर्खा कास्कीले ६ अंक जोड्यो  ।

समूह विजेता बनेको मिनामले एक्स-गोर्खा कास्कीलाई २-० , हैरान्स दमौलीलाई ८-० र एन्फा-कास्कीलाई २-१ ले पराजित गर्यो ।  एक्स-गोर्खाले एन्फा कास्कीलाई २-० ले पराजित गर्दा हैरान्स दमौलीबाट बाइ पाएको थियो ।

अब फाइनल प्रवेशका लागि बा.घे.ताले एक्स-गोर्खा तथा एरिनले मिनामको सामना गर्नेछ ।

लमजुङ फुटसलले आयोजना गरेको प्रतियोगिताको विजेताले ३० हजार र उपविजेताले १५ हजार पाउने छन् ।