सन्यास घोषणा गर्दै मोर्गन

काठमाडौं । इंग्ल्यान्डका विश्वकप विजेता कप्तान इयान मोर्गनले अन्तराष्ट्रिय क्रिकेटबाट सन्यास घोषणा गर्ने भएका छन् ।

३५ वर्षीय मोर्गनले मंगलबार सन्यासको घोषणा गर्ने बीबीसीले जनाएको छ ।

मोर्गनको कप्तानीमा इंग्ल्यान्डले २०१९ को आईसीसी एकदिवसीय विश्वकपको उपाधि जितेको थियो ।

पछिल्लो समय उनलाई फिटनेसले सताईरहेको छ । उनको स्थान जोस बट्लरले लिने सम्भावना रहेको छ ।

मोर्गन एकदिवसीय र टी-ट्वान्टीमा इंग्ल्यान्डका सर्वाधिक रन बनाउने खेलाडी हुन् ।

उनले एकदिवसीयमा ६ हजार ९५७ रन बनाएका छन् । टी-ट्वान्टीमा २ हजार ४५८ रन बनाएका छन् ।

इंग्ल्यान्डका लागि उनले २ सय २५ एकदिवसीय र १ सय १५ टी-ट्वान्टी अन्तराष्ट्रिय खेलेका छन्  ।