रोनाल्डो चम्किदा पोर्चुगलको सहज जित

काठमाडौं । यूईएफए नेसन्स लिग फुटबलमा एक पटकको विजेता पोर्चुगलले सहज जित निकालेको छ ।

समूह चरण अन्तर्गत आइतबार राति पोर्चुगलले स्विजरल्याण्डलाई ४-० गोल अन्तरले हराएको हो ।

पोर्चुगलको जितमा कप्तान क्रिस्टियानो रोनाल्डोले दुई गोल गरे ।

खेलको पाँचौं मिनेटमा विलियम कार्भाल्होले गोल गर्दै पोर्चुगललाई सुरुआती अग्रता दिलाएका थिए ।

३५ औं मिनेटमा रोनाल्डोले गोल गर्दै टिमको अग्रता दोब्बर बनाए ।

खेलको ३९ औं मिनेटमा रोनाल्डोले व्यक्तिगत दोस्रो गोल गर्दै टोलीको अग्रता ३-० को बनाए ।

त्यसपछि खेलको ६८ औं मिनेटमा जोआ कान्सेलोले गोल गर्दै पोर्चुगललाई ४-० गोलको जित दिलाए ।

जितसँगै लिग ए समूह २ को पोर्चुगलले महत्वपूर्ण ३ अंक जोडेको छ ।

२ खेलमा ४ अंक जोडेको पोर्चुगल समूहको शीर्ष स्थानमा रहेको छ ।

स्विजरल्याण्डले भने लगातार दोस्रो हार व्यहोरेको छ ।