काठमाडौं । एसिया कप छनोट खेल्न राष्ट्रिय फुटबल टिम बुधबार साँझ कतार प्रस्थान गर्दैछ । नियमित कप्तान किरण चेम्जोङ सहित सिनियर ११ खेलाडीलाई बाहिर राख्दै मुख्य प्रशिक्षक अब्दुल्लाह अलमुताईरी कतार भ्रमणमा निस्कदैछन् । नेपालले कुवेतमा एसिया कप छनोटको तीन खेल खेल्नेछ ।
पछिल्लो विवाद र सार्वजनीक प्रतिवेदन अनुसार प्रशिक्षक अलमुताईरीको कुवेत यात्रा अन्तिम हुने ठानिएको छ । विवादका अनेकन श्रृङ्खलासँग जोडिएका अलमुताईरीलाई हटाउन र उनको विकल्प खोज्ने एन्फाद्धारा गठिन छानविन समितिले सिफारिस गरिसकेको छ ।
समितिले एसिया कप छनोट लगत्तै मुख्य प्रशिक्षकको विकल्प खोज्न एन्फालाई सिफारिस गरिसकेपछि बुधबारको कुवेत यात्रानै नेपालको राष्ट्रिय फुटबलका लागि अलमुताईरीको अन्तिम यात्रा मानिएको छ ।
छानविन समितिको प्रतिवेदनमा भनिएको छ, ‘एकै पटक ९ जना खेलाडी क्याम्प छाडेर जानुमा मुख्य प्रशिक्षक, व्यवस्थापक तथा एन्फा सचिवालयको पनि अवश्य केही क्रुटी छन् । मुख्य प्रशिक्षकको स्वास्थ्य स्थितिले गर्दा उत्तेजक र तनावमा देखिनु, स्वास्थ्य परीक्षणको लागि विदा स्वीकृत रहेको अवस्था, फरक सामाजिक र सांस्कृतिक परिवेश, बारम्बार विवाद तथा सामाजिक सञ्जालमा अनावश्यक टिकाटिप्पणी जस्ता कृयाकलापले गर्दा राष्ट्रिय टिममा स्वच्छ वातावरण नभएको देखिन्छ । यस्तो अवस्थामा भविष्यमा अरु समस्या उब्जने प्रवल सम्भावनालाई समेत नकार्न सकिदैन । तसर्थ, एसिया कप छनोट प्रतियोगितापछि कतार एफएसँगको सहययोगलाई निरन्तरता र सहमती कायम राख्दै मुख्य प्रशिक्षकको अर्को विकल्प खोज्न सिफारिस गरिन्छ ।’
एफसी कप छनोटको तयारी सुरु गर्दै गर्दा मुख्य प्रशिक्षक अलमुताईरीले नेपाल एसिया कपमा छनोट हुन नसक्ने उद्घोष गरिसकेका छन् । नेपाली फुटबलको स्तर निकै तल रहेको बताउँदै उनले एसिया कपको सपना नदेख्न समर्थक तथा फुटबलकर्मीलाई उनले आग्रह गरेका थिए । खेल अगावै हात उठाएको भन्दै उनको आलोचना भएको थियो ।
राष्ट्रिय फुटबल टिमको जिम्मेवारीमा आएपछि अलमुताईरी चर्चाको शिखरमा आएका थिए । खेलाडीको आत्मविश्वास बढाउन, संरक्षण गर्न र साफको फाईनल यात्रा तय गराउन उनले महत्वपुर्ण भुमिका खेलेका थिए । सुरुवाती दिनमा खेलाडीको हक हित र अधिकारको पक्षमा देखिने अलमुताईरी पछिल्लो समय आफै सर्वेसर्वा जसरी प्रस्तुत हुने गरेका थिए । खेलाडीलाई मानसीक यातना दिने, राष्ट्रिय टिमबाट निकाल्ने बारम्बार धम्की दिने, खेलाडीलाई परिवार, समर्थक, प्रशंसकसँग टाढा राख्ने, मिडियामा बोल्न रोक लगाउने, खेलाडीमाथि अनावश्यक नियन्त्रण जमाउने गतिविधिले उनी समस्यामा परेका थिए ।
प्रशिक्षणको क्रममा राम्रो होटलमा राख्न माग गरेकै कारण उपकप्तान रोहित चन्द सहित सिनियर खेलाडीलाई उनले बन्द प्रशिक्षणबाट निकालेका थिए । एन्फाको राजनीतिलाई फुटबल टिमभित्र घुसाएर अनावश्यक हस्तक्षपमा उत्रिएका अलमुताईरीको एसिया कप छनोट खेल्ने कतार यात्रालाई अन्तिम मानिएको छ ।
राष्ट्रिय टिमको जिम्मेवारी पाउने बित्तिकै अलमुताईरीले वर्तमान एन्फा अध्यक्ष कर्माछिरिङ शेर्पा बाहेक अन्य नेतृत्वसँग काम नगर्ने बताएका थिए । एन्फा चुनावको संघारमा छ । अध्यक्षका दाबेदार पंकजबिक्रम नेम्वाङ नेतृत्वमा आए अलमुताईरी राष्ट्रिय टिमको जिम्मेवारी पाउने सम्भावना उत्तिकै पनि कमनै छ ।
शेर्पानै नेतृत्व दोहरिएको खण्डमा पनि बारम्बार विवादमा तानिएका प्रशिक्षकको विकल्प खोज्नुपर्ने चुनौती उनीसँग रहनेछ । वर्तमान प्रशिक्षकबाट भविष्यमा अरु ठुलो समस्या उब्जने भएकाले कतार एफएसँग सहमती कायम गरेर अलमुताईरीको विकल्प खोज्नुपर्ने प्रतिवेदन सार्वजनीक भैसकेको छ ।
कतार फुटबल संघले नेपाली फुटबलको विकासमा सहयोग गर्न भन्दै मुख्य प्रशिक्षकको रुपमा अलमुताईरीको तलबमा सहयोग गर्ने गरेको छ । नेपालको राष्ट्रिय टिमको जिम्मेवारीमा रहेबापत अलमुताईरीले कतारबाट १० हजार बढी अमेरिकी डलर प्राप्त गर्छन् । अखिल नेपाल फुटबल संघले पनि यातायात र सञ्चारका लागि भन्दै दुई हजार डलर अलमुताईरीलाई उपलब्ध गराउँदै आएको छ ।
-1750132667.webp)
