म्यानचेस्टर युनाइटेडमा के भइरहेको छ ?
काठमाडौं । यो त कल्पना पनि गर्न सकिन्न, म्यानचेस्टर युनाइटेड ब्राइटनको हातबाट ४–० ले पराजित हुनु । त्यसैले त म्यानचेस्टरका समर्थकले भनिरहेका छन्, अहिलेका खेलाडी क्लबको जर्सि लगाउन पनि योग्य छैनन् । कुनै समय क्लबका लागि मरिमेट्ने समर्थक टिमको प्रदर्शनबाट कति धेरै वाक्क र दिक्क भइसकेका छन् भने यो हारपछि त खेलाडीलाई ‘छि छि’ समेत भनिरहेका छन् । नभनोस पनि किन, ब्राइटन त्यस्तो टिम थियो, जसले सन् २०२२ मा यस अगाडि आफ्नै मैदानमा कुनै खेल जितेको थिएन् ।
तर यही टिमले एमेक्स स्टेडियममा भएको ९० मिनेटको खेलमा म्यानचेस्टरलाई पूर्णत: लज्जायोग्य बनायो, मैदानमा खेल्नै दिएन्, खेलाडीमा फुटबलको सुझबुभ कै अभाव पनि देखियो, अनि सबैलाई प्रश्न गर्न बाध्य पार्यो, होइन, यो म्यानचेस्टरमा के भइरहेको छ ? कीर्तिमान २० पल्टको इंग्लिस च्याम्पियन म्यानचेस्टरविरुद्ध ब्राइटनले यसअघि २७ खेल खेलेकोमा तीनै जित मात्र हात पारेको थियो । यसपल्टको जित चौथो रह्यो र विशेष रह्यो ।
यो जितपछि ब्राइटनले क्लबको १ सय २१ लामो इतिहासमा पहिलो पल्ट माथिल्लो डिभिजनको शीर्ष १० आफूलाई कायम राख्न सक्ने सम्भावना बनेको छ । ओले गन सोल्सारलाई बर्खास्त गरेयता निमित्त व्यवस्थापक बनेका राल्फ राङनिकका लागि पछिल्ला छ महिना वास्तवमै निकै खराब रहे । उनले टिमका लागि जे जति अपेक्षा गरिएको थियो, केही गर्न सकेनन् । त्यस अर्थमा उनले यसपल्टको ओल्ड ट्रायफोर्ड बसाइ पूर्णत: असफल जस्तै रह्यो ।
यी जर्मन फुटबल प्रशिक्षक पनि मान्छन्, केही राम्रो भएन नै । उनले ब्राइटनविरुद्धको खेल गुमाइपछि प्रतिक्रिया दिएका छन्, ‘आज म्यानचेस्टरको प्रदर्शन वास्तवमै खराब रह्यो । खेल सुरु भएदेखि अन्त्य नभएसम्म हाम्रा खेलाडीले खेल्नै सकेनन् । खेल्ने प्रयास पनि गरेनन् भन्दा हुन्छ । हामीले ब्राइटनको आक्रमणलाई रोक्न नै सकेनौं ।यो हार हाम्रो लागि वास्तवमै लज्जास्पद रह्यो । त्यसैले हामीले आफ्नो समर्थकसामु माफि माग्नु पर्छ ।’
यसपल्टको सिजन समाप्त हुनै लागेको छ, तर अझै पनि म्यानचेस्टरका लागि यो लामो लाग्न सक्छ । हारले उसको अर्को सिजन युरोपेली च्याम्पियन्स लिग खेल्ने झिनो सम्भावना पनि समाप्त जस्तै भइसकेको छ । अझ अर्को सिजन म्यानचेस्टरले युरोपा लिग खेल्ने छ भनेर पनि ठोकुवा गर्न नसकिने भएको छ । खालि यति भन्न सकिन्छ, म्यानचेस्टरले युरोपेली क्लब फुटबलको तेस्रो क्रमको प्रतियोगिता युरोपा कन्फ्रेन्स लिग भने खेल्नेछ ।
अर्को सिजन म्यानचेस्टरको जिम्मा हुनेछ, डच प्रशिक्षक एरिक टेन हागमाथि । तर उनी आउने वित्तिकै केही राम्रो हुनेछ भनेर विश्वास गरिहाल्ने स्थान पनि छैन्, किनभने एलेक्स फर्गुसनले सन्यास लिएयता धेरै यस्तै नाम चलेका प्रशिक्षक आए र गए पनि । तर प्रत्येक पल्ट सबलाई लागेको छ, अब म्यानचेस्टरलाई ब्युँझाउन गाह्रो छ । त्यसको अर्थ टेन हागलाई पनि अहिलेको यो म्यानचेस्टरलाई पुराना सफल टिममा फर्काउन गाह्रै हुनेछ, खालि असम्भव नभनौं ।
–बीबीसीको सहयोगमा ।
