काठमाडौं । पाएको मौका सदुपयोग गर्न नसक्दा एएफसी फुटसल एसियन कप छनोटको पहिलो खेलमा पराजित भएको नेपालका कप्तान अनिस श्रेष्ठले बताएका छन् ।
कप्तान अनिसले एसियन छनोट कपमा उज्वेकिस्तानसँग पराजित भएपछि मौका सदुपयोग गर्न नसक्दा पराजित हुनु परेको प्रतिक्रिया दिएका हुन् ।
'पाएको मौका सदुपयोग गर्न नसक्दा हार्नु पर्यो । खेल जे जस्तो भएपनि मौका हामीले धेरै बनाएका थियौं ।' उज्वेकिस्तानसँग पराजित भएपछि कप्तान अनिसले भने, 'दोस्रो हाफमा हामीले दबाब दिएका थियौं र हाम्रो दुई प्रहार पोलमा लाग्यो । त्यो गोल भएको भए सायद नतिजा ३-३ हुन्थ्यो ।'
खेलमा नेपाल ५-१ ले पराजित भएको थियो । नेपालका मणि लामाले एक गोल फर्काए ।
मणिको गोलपछी नेपाल खेलमा फर्किन प्रयास गरेको थियो तर मौकाहरु गुमाउँदा उज्वेकिस्तानलाई नतिजा सुम्पिन पुगेको थियो ।
'मणिले गोल फर्काएपछि टिममा उर्जा आएको थियो तर दुई भर्सेस एकको स्थितमा समेत गोल गर्न नसक्दा पराजित हुनु पर्यो ।' कप्तान अनिस भन्छन्, 'हाम्रो खेलाडीहरुले उनीहरुको (उज्वेकिस्तान) मुभमेन्ट क्याच गर्न सकेनन् । उज्वेकिस्तान भनेको विश्वकप खेलेर राउण्ड-१६ सम्म पुगेको टिम हो । उनीहरुको गतिलाई हामीले बुझ्न नसक्दा खेलमा चुक्यौं ।'
खेलको २८ औं मिनेटमा मणिले गोल फर्काउँदा नेपाल ३-१ को स्थितिमा थियो ।
यस्तै नेपालले उज्वेकिस्तानविरुद्धको खेललाई सकारात्मक रुपमा लिएको र आगामी खेलमा यस खेलबाट सहज हुने विश्वास लिएको छ ।
'आजको खेललाई एकदम सकारात्मक लिएका छौं । आउने खेलमा मौकाको सदुपयोग गरेर ताजिकिस्तान र अफगानिस्तानलाई जित्ने प्रयास गर्ने छौं ।' अनिसले थपे ।
समूह ‘बी’ मा रहेको नेपालले सोमबार ताजिकिस्तान र अन्तिम खेलमा मंगलबार अफगानिस्तानसँग समूह चरणको अन्तिम खेल्ने छ ।
-1750132667.webp)
