'फुटसललाई एक कदम माथि पुर्‍याउने लक्ष्य'

काठमाडौं । एएफसी फुटसल एसियन कप छनोट नेपालका लागि नौलो प्रतियोगिता हैन ।

नेपाली राष्ट्रिय फुटसल टोलीले दुई पटक एसियन कप छनोट खेलिसकेका छन् । तर, नेपालको प्रदर्शन सहभागितामै सिमित हुँदै आईरहेको छ ।

यतिबेला नेपाली फुटसल टोली तेस्रो पटक एएफसी फुटसल एसियन कप छनोट खेल्ने तयारीमा जुटेको छ । किर्गिस्तानमा आगामी अप्रिलमा आयोजना हुने छनोटका लागि नेपाली टोलीले दैनिक प्रशिक्षण गरिरहेका छन् ।

सेन्ट्रल र साउथ जोन अन्तर्गतको छनोटमा नेपाल समूह 'बी' मा रहेको छ । नेपालको समूहमा उज्वेकिस्तान, ताजिकिस्तान र अफगानिस्तान रहेका छन् ।

यस पटकको छनोटमा भने नेपालले फरक लक्ष्य लिएको छ । नेपालले किर्गिस्तानमा उत्कृष्ट प्रदर्शन गर्दै नेपाली फुटसललाई एक कदम माथि पुर्‍याउने लक्ष्य बनाएको छ ।

नेपाली टोलीका मुख्य प्रशिक्षक गौरव बस्नेतले टोलीले हेपिएको नेपाली फुटसललाई एक कदम अगाडी बढाउने लक्ष्य रहेको बताए । प्रशिक्षक बस्नेतले छनोटमा कम्तिमा एक जित निकाल्ने योजना रहेको बताए ।

'अरुको विचारमा के छ मलाई थाहा छैन । प्रशिक्षकको रुपमा मैले एउटा ड्रिम टिम बनाएको छु । त्यो अनुसार खेलाडीलाई मेरो अनुभव र फिलोसोपी बुझाएको थिए,' प्रशिक्षक बस्नेतले भने, 'कम्तिमा यस पटक फुटसलका लागि केहि गरौँ । फुटसललाई एक कदम भएपनि माथि लैजाउ । एक खुट्किला भएपनि उकालौ भन्ने हिसाबले खेलाडीलाई सम्झाईरहेको छु । प्रेरित गरिरहेको छु । त्यहिँ अनुसार तयारी पनि भईरहेको छ ।'

प्रशिक्षक बस्नेतले फुटसल नेपालमा हेपिएको खेलमा पर्ने बताए । तर, यस पटकको छनोटबाट फुटसललाई हेर्ने नजर परिवर्तनका लागि प्रयास गर्ने उनले बताए ।

'फुटसललाई नेपालमा हेपिएको छ । एफए, म्यानेजमेन्ट सबैबाट हेपिएको छ । आउछ जान्छ खेल्ने भने सोचेका छन्,' प्रशिक्षक बस्नेत भन्छन्, 'फुटसल हरेक देश बढ्दैछ । नेपालमा पनि बढिरहेको छ । यस पटक हारेपनि खेल्ने तरिका, अन्तराष्ट्रिय खेलाडी र प्रशिक्षकहरुले नेपालले पनि खेलेको छ है । यो सिस्टमले खेलेको छ । राम्रो प्रतिस्पर्धा दिएको छ भन्ने सम्म बनाउने छु ।'

छनोटमा नेपालले अहिलेसम्म जित र बराबरीको नतिजा निकाल्न सकेको छैन । यस पटक भने कम्तिमा एक खेल जित्ने लक्ष्य नेपालले बनाएको छ ।

'हामीले यस पटक जसरी पनि एउटा एउटा खेल जित्ने नै लक्ष्य बनाएका छौँ । सायद सफल पनि हुन्छौ होला,' प्रशिक्षक बस्नेतले भने, 'उनीहरु (विपक्षी) बलियो टिम छ तर उनीहरुको खेल हामीलाई थाहा छ । हामीले उनीहरुको हरेक खेल हेरिरहेका छौँ ।  हाम्रोबारे उनीहरुलाई थाहा छैन । हामी अन्डर डग टिम हौँ । हामीले फाईदा लिन सक्छौं ।'

एएफसी मापदण्डको पूर्वाधार नहुँदा भने नेपाली टोलीको तयारीमा समस्या देखिएको छ । सुरुआतमा फाइभ ए साइडको कोर्टमा तयारी गरेको नेपाली टोलीले हाल एलए स्कुलको कोर्टमा तयारी गरिरहेका छन् ।

'पोखरामा मात्र एएफसीको मापदण्ड अनुसारको भेन्यु छ । इन्डोरमा खेलिन्छ फुटसल यहाँ हामी आउटडोरमा खेलिरहेका छौँ । खुल्लामा अक्सिजन धेरै हुन्छ प्रदर्शन पनि राम्रो हुन्छ तर खुल्लामा खेलेर इन्डोरमा खेल्न गार्हो हुन्छ । त्यो चिन्ता छ । एन्फामा कुरा गर्दा पोखरामा १० दिन हुन्छ नत्र कतारमा बन्द प्रशिक्षण हुन्छ भनेका छन् । त्यो भयो भने हामीलाई एकदम राम्रो हुन्छ,' प्रशिक्षक बस्नेत भन्छन् ।

प्रशिक्षक बस्नेतले आफुले एन्फामा तीन महिनाको योजना पेश गरेपनि कोभिड लगायत अन्य कारणले प्रयाप्त तयारी गर्न नसकिएको बताए ।

'३ महिनाको प्लान पेश गरेको थिए । कोभिड र अन्य कारणले १ महिनामा झार्नु पर्यो । फिल्ड पाएको छ । अहिले राम्रो हुँदैछ । ठुलो फिल्डमा खेलाडी भिज्दै छन्,' बस्नेतले भने ।

छनोटमा अट्याकिङ फुटसल खेल्ने योजना रहेको समेत प्रशिक्षक बस्नेतले बताए ।

'हामी यसपटक पहिला जस्तो डिफेन्स बसेर खेल्दैनौं । हामी प्रेस गरेर खेल्छौं । हारजित आफ्नो स्थानमा छ । हामी हारेपनि केहि कुरा सिक्छौं,' उनले भने, 'त्यहिँ भएर हामो अट्याकिङ खेल्ने योजना छ । मिक्स डिफेन्सिभ खेल्छौं । परिस्थिति हेरेर खेल्छौं ।'

राष्ट्रिय फुटसल टोलीका सदस्य सुमित आलेले पनि कम्तिमा एक खेल जित्ने लक्ष्यसहित तयारी गरिरहेको बताए ।

'तयारी राम्रो भईरहको छ । पहिले फाईभ ए साइडमा तयारी गरिरहेका थियौं । अहिले राम्रै ठाउ पाएका छौँ । अन्तराष्ट्रिय भन्दा त सानै छ । राम्रो भईरहेको छ,' पिभोट पोजिसनमा खेल्दै आएका सुमितले भने, ' फुटसलमा नेपाललाई कम्तिमा एक खेल जिताउ । बराबरी गरेर आउ भन्ने आशा र सपना छ । मेरो मात्र हैन सबैको सपना छ ।'

सुमितले राष्ट्रिय टोलीबाट यस अघि दुई पटक छनोट खेलिसकेका छन् । राष्ट्रिय टोलीका लागि उनी अनुभवी खेलाडी हुन् । यस पटकको छनोटमा कम्तिमा अफगानिस्तानलाई हराउने लक्ष्य रहेको उनी बताउछन् ।

'उज्वेकिस्तान एकदमै गार्हो हुन्छ । ताजिकिस्तान पनि बलियो टिम छ । अफगानिस्तान कता कता हाम्रै स्तरको जस्तो लाग्छ । तरपनि हामी भन्दा १० वर्ष अगाढी खेलेर आएको हो । एउटा खेलमा केहि न केहि हुन्छ जस्तो लागेको छ,' सुमितले भने ।

सुमितले नेपाली फुटसल विस्तारै अघि बढिरहेको समेत बताए ।

'फुटसल विस्तारै अघि बढ्दैछ । जसरी जानु पर्थ्यो भएको छैन । तर, स्तर खस्किएको छैन । अहिले खेलेर आओस, सहभागिता जनाएर मात्रै आओस भन्ने जस्तो भईरहेको छ,' सुमितले भने, 'भविष्यमा यस्तो नहोस । किनभने अन्य देश २० वर्ष खेलेर आएको हुन्छ । हाम्रो एक महिनाको तयारीले पुग्दैन ।'

सुमितले नेपालले बल्ल फुटसल सिकिरहेको समेत बताए । फुटसलका लागि निश्चित ठाउ, एउटा हल र पार्केटिङ ग्राउण्ड भयो भने नेपालको फुटसलले चाडै विकास गर्ने समेत उनले बताए ।