मछिन्द्र र ब्लू स्टारबीचको खेल दशरथ रंगशालामा हुने

काठमाडौं । एएफसी कप छनोट अन्तर्गत मछिन्द्र फुटबल क्लब र श्रीलंकाको ब्लू स्टारबीचको खेल त्रिपुरेश्वरस्थित दशरथ रंगशालामा हुने भएको छ । 

अखिल नेपाल फुटबल संघ (एन्फा) ले जनाए अनुसार मछिन्द्र र ब्लू स्टारबीचको खेल अप्रिल ५ मा दशरथ रंगशालामा साँझ ५ बजेबाट सुरु हुनेछ । 

एन्फाका अनुसार एएफसीले बिहीबार मैदान र समयको टुंगो लगाएको हो । 

सहिद स्मारक ए डिभिजन लिगको सातौं चरणसम्म अंकतालिकाको शीर्ष स्थानमा रहेको आधारमा मछिन्द्रले एएफसी कप छनोटका लागि छनोट भएको थियो । 

ब्लू स्टारविरुद्धको खेलमा जित हात पारेको खण्डमा मछिन्द्रले अप्रिल १२ मा भारतको एटीके मोहन बगानविरुद्ध कोलकाताको विवेकानन्द युवा भारती क्रिरांगामा खेल्नेछ । 

समूह चरणमा स्थान बनाउन मछिन्द्रलाई मोहन बगानविरुद्धको खेल पनि जित्नुपर्ने हुन्छ ।