रबि चम्किदा पुलिसको जित

काठमाडौं । विभागीय टोली नेपाल पुलिस क्लबले सहिद स्मारक 'ए' डिभिजन लिग फुटबलमा जित निकालेको छ ।

बुधबार भएको खेलमा पुलिसले च्यासल युथ क्लबलाई २-१ गोल अन्तरले हराएको हो ।

त्रिपुरेश्वरस्थित दशरथ रंगशालामा पुलिसलाई जित दिलाउन रबि शंकर पासवानले दुई गोल गरे । च्यासलका मौसा अबागानाले एक गोल फर्काए ।

प्रतिस्पर्धात्मक बनेको खेलको ३७ औं मिनेटमा मिडफिल्डर पासवानले गोल गर्दै पुलिसलाई सुरुआती अग्रता दिलाएका थिए ।

नीर कुमार राईले उपलब्ध गराएको बलमा पेनाल्टी क्षेत्रबाट उनले क्रस गरेको बलले सिधै पोस्टको जाली चुमेको थियो ।

तर, खेलको ५३ औं मिनेटमा मौसाले पेनाल्टीमा गोल गर्दै च्यासललाई १-१ गोलको बराबरीमा ल्याएका थिए ।

पुलिसका कप्तान सुमन सुवेदीले ५१ औं मिनेटमा रुमेश बर्तौलालाई पेनाल्टी क्षेत्रभित्र लडाएपछि च्यासलले पेनाल्टीको अवसर पाएको थियो ।  

त्यसपछि खेलको ७० औं मिनेटमा पासवानले व्यक्तिगत दोस्रो गोल गर्दै पुलिसलाई २-१ को जित दिलाए ।  

सुमन लामाले उपलब्ध गराएको बलमा पासवानले पेनाल्टी क्षेत्र भित्रबाट उत्कृष्ट गोल गरे ।

त्यस बाहेक दुबै टोलीले अन्य गोलको अवसर खेर फालेका थिए ।

खेलको १६ औं मिनेटमा पुलिसका निरकुमार राईको सशक्त प्रहार पोस्टको फ्रेममा पर्न सकेन ।

२४ औं मिनेटमा पुलिसका तेज तामाङले करिब २० यार्ड टाढाबाट प्रहार गरेको बल पोस्टको नजिकबाट बाहिरिएको थियो ।

दोस्रो हाफमा पुलिसको तुलनामा च्यासलले बढी विपक्षीको पोस्टमा आक्रमण गरेको थियो । तर, च्यासल सफल भएन।

४८ औं मिनेटमा च्यासलका सुजित बुढाथोकीले प्रहार गरेको बल पुलिसका गोलकिपर सत्रुघन चौधरीले सहजै नियन्त्रणमा लिए ।

खेलको ८३ औं मिनेटमा च्यासलका कमल श्रेष्ठको कर्नरमा आशिष लिम्बुको हेडर प्रहार तेज तामाङले गोललाइनबाट क्लियर गरे ।

लगत्तै कामलकै कर्नरमा आशिषको हेडर प्रहार क्रसबारमा लागेर फर्किएको थियो ।

खेलको ८७ औं मिनेटमा च्यासलले गोलको अर्को मौका गुमायो । विकासले उपलब्ध गराएको पासमा सिक्स यार्ड बक्सभित्र रहेका कर्ण लिम्बुको वाच टच प्रहार पुलिसका गोलकिपर चौधरीले सहजै नियन्त्रणमा लिए ।

खेलको इन्जुरी समयमा च्यासलका यान्निक केचाले प्रहार गरेको बल अजित भण्डारीलाई लाग्दै त्यसपछि पोस्टमा लाग्दै बाहिरिएको थियो ।

यस जितसँगै पुलिसले ९ खेलमा १० अंक जोडेको छ । पुलिस लिगको दशौँ स्थानमा उक्लिएको छ । 

च्यासल ९ खेलमा ५ अंक जोडेर १३ औं  स्थानमा रहेको छ  ।  

खेलमा पुलिसका दुई गोलकर्ता रबि प्लेयर अफ दि म्याच चुनिए ।

च्यासलका आशिष राई इमर्जिङ प्लेयर चुनिए ।